નવી દિલ્હીની રાઉઝ એવન્યુ કોર્ટે સોમવારે દેશના રાજકારણમાં ભારે ચકચાર જગાવનારા 'લેન્ડ ફોર જોબ' એટલે કે નોકરીના બદલામાં જમીન કૌભાંડ કેસમાં બિહારના પૂર્વ મુખ્યમંત્રી લાલુ પ્રસાદ યાદવ અને તેમના પત્ની રાબડી દેવી સામે સત્તાવાર રીતે આરોપો નક્કી કર્યા છે. આ કેસમાં કોર્ટે ભ્રષ્ટાચાર અને ગુનાહિત કાવતરાની કલમો હેઠળ આરોપો ઘડ્યા છે, જે લાલુ પરિવાર માટે મોટી કાનૂની મુસીબત સમાન છે. આ કેસ એ સમયનો છે જ્યારે લાલુ પ્રસાદ યાદવ યુપીએ સરકારમાં રેલવે મંત્રી હતા. સીબીઆઈનો આરોપ છે કે વર્ષ ૨૦૦૪ થી ૨૦૦૯ દરમિયાન લાલુ યાદવે રેલવે મંત્રી તરીકેના તેમના કાર્યકાળમાં રેલવેમાં ગ્રુપ-ડીની નોકરીઓ અપાવવા બદલ ઉમેદવારો પાસેથી લાંચ પેટે જમીનના પ્લોટ લીધા હતા.

તપાસ એજન્સીના જણાવ્યા અનુસાર, પટનામાં આવેલી કિંમતી જમીનો લાલુ યાદવના પરિવારના સભ્યો અને તેમની સાથે સંકળાયેલી કંપનીઓના નામે કોડિઓના ભાવે ટ્રાન્સફર કરવામાં આવી હતી. આ જમીનોના બદલામાં અનેક લોકોને રેલવેમાં નોકરી આપવામાં આવી હતી. આ મામલે સીબીઆઈ અને ઈડી બંને એજન્સીઓ તપાસ કરી રહી છે. કોર્ટમાં સુનાવણી દરમિયાન સીબીઆઈએ દલીલ કરી હતી કે આ એક સુવ્યવસ્થિત કૌભાંડ હતું, જેમાં સત્તાનો દુરુપયોગ કરીને આર્થિક લાભ મેળવવામાં આવ્યો હતો. કોર્ટે પુરાવાઓને ધ્યાનમાં રાખીને લાલુ યાદવ, રાબડી દેવી અને અન્ય આરોપીઓ સામે આરોપો ઘડવાનો આદેશ આપ્યો હતો. જોકે, આરોપી પક્ષ તરફથી આ તમામ આરોપોને રાજકીય રીતે પ્રેરિત ગણાવીને નકારવામાં આવ્યા છે. હવે આ કેસમાં આગળની ટ્રાયલ શરૂ થશે, જેમાં સાક્ષીઓની જુબાની અને પુરાવાઓની ચકાસણી કરવામાં આવશે. આ નિર્ણયથી બિહારના રાજકારણમાં ગરમાવો આવી ગયો છે અને આગામી દિવસોમાં આરજેડી માટે મુશ્કેલીઓ વધી શકે છે. *