પટણા: બિહારના વહીવટી તંત્ર અને રાજકારણમાં અત્યારે એક IAS અધિકારીની હવાઈ મુસાફરી ચર્ચાના કેન્દ્રમાં છે. 2011 બેચના સિનિયર IAS અધિકારી નિલેશ દેવરે દ્વારા પરિવાર સાથે કરવામાં આવેલી ચાર્ટર પ્લેનની મુસાફરીનો મુદ્દો વિધાન પરિષદમાં ગાજ્યો છે. વિપક્ષે આને નિયમોનું ઉલ્લંઘન ગણાવ્યું છે, જ્યારે સરકારે આ વિવાદને સામાજિક ન્યાય અને દલિતોના અધિકાર સાથે જોડીને નવો વળાંક આપ્યો છે.
શું છે આખો વિવાદ?
આ વિવાદની શરૂઆત ત્યારે થઈ જ્યારે વિપક્ષી સભ્ય રાહુલ કુમારે નિલેશ દેવરેના પરિવાર સાથેના ચાર્ટર પ્લેન પ્રવાસ પર પ્રશ્ન ઉઠાવ્યો. સરકારી પક્ષ વતી મંત્રી અશોક ચૌધરીએ બચાવ કરતા કહ્યું કે, આ ઘટના ગયા વર્ષે જુલાઈની છે. જ્યારે મુખ્યમંત્રી નીતિશ કુમાર એક કાર્યક્રમમાં ગયા હતા ત્યારે પરત ફરતી વખતે વિમાન ખાલી હતું. જો કોઈ અધિકારી ખાલી વિમાનમાં બેસીને પરત ફરે તો તેમાં કશું ખોટું નથી. મંત્રીએ આક્રમક રીતે પૂછ્યું, "શું દલિતો અને પછાત વર્ગના લોકોને વિમાનમાં મુસાફરી કરવાનો અધિકાર નથી?"
કોણ છે IAS નિલેશ દેવરે?
મૂળ મહારાષ્ટ્રના નાસિકના વતની અને વ્યવસાયે ડોક્ટર રહી ચૂકેલા નિલેશ રામચંદ્ર દેવરે બિહાર કેડરના અત્યંત તેજસ્વી અધિકારી માનવામાં આવે છે.
•    વર્તમાન પદ: તેઓ બિહાર પ્રવાસન વિભાગના સચિવ છે અને નાગરિક ઉડ્ડયન વિભાગની મહત્વની જવાબદારી સંભાળે છે.
•    અગાઉના પદો: તેઓ મધુબની, છાપરા અને બેતિયા જેવા જિલ્લાઓમાં કલેક્ટર (DM) તરીકે સેવા આપી ચૂક્યા છે.
•    કેન્દ્રીય કનેક્શન: તેઓ કેન્દ્રીય મંત્રી જ્યોતિરાદિત્ય સિંધિયાના અંગત સચિવ (PS) તરીકે પણ કાર્ય કરી ચૂક્યા છે.
ભ્રષ્ટાચાર વિરુદ્ધની લડાઈ કે રાજકીય કિન્નાખોરી?
મંત્રી અશોક ચૌધરીએ દાવો કર્યો હતો કે નિલેશ દેવરે જ્યારે આરોગ્ય વિભાગમાં હતા, ત્યારે તેમણે સપ્લાય ચેઈનમાં ચાલતા ભ્રષ્ટાચારને રોકવા માટે 15 શક્તિશાળી લોકો સામે કાર્યવાહી કરી હતી. આ લોકો RJD સાથે જોડાયેલા હોવાનો આક્ષેપ કરતા મંત્રીએ કહ્યું કે, જૂના અદાવતનો બદલો લેવા માટે જ વિપક્ષ હવે આ મામલાને બિનજરૂરી રીતે ચગાવી રહ્યો છે.
હાલમાં બિહારમાં આ મુદ્દો માત્ર વહીવટી તપાસ પૂરતો મર્યાદિત નથી રહ્યો, પણ દલિત સ્વાભિમાન અને રાજકીય શ્રેય લેવાની લડાઈમાં ફેરવાઈ ગયો છે. વિપક્ષ માફીની માંગ કરી રહ્યો છે, જ્યારે સત્તા પક્ષ અધિકારીની પાછળ મજબૂતીથી ઊભો છે.