નવી દિલ્હી : નેશનલ ટેસ્ટિંગ એજન્સી (NTA) દ્વારા સોમવારે સાંજે જોઈન્ટ એન્ટ્રન્સ એક્ઝામિનેશન (JEE) મેઈન ૨૦૨૬ સેશન-૧ ના પરિણામોની સત્તાવાર જાહેરાત કરવામાં આવી છે. આ વર્ષે દેશભરમાંથી કુલ ૧૨ વિદ્યાર્થીઓએ ૧૦૦ પર્સન્ટાઈલ મેળવીને મેદાન માર્યું છે. આ ૧૦૦ પર્સન્ટાઈલ મેળવનારા ૧૨ ટોપર્સમાં ગુજરાતના પુરોહિત નિમયનો સમાવેશ થાય છે, જેણે પોતાની ઝળહળતી સફળતાથી સમગ્ર રાજ્યનું ગૌરવ વધાર્યું છે.
પરીક્ષાનું આયોજન અને આંકડાકીય વિગતો:
જેઈઈ મેઈન સેશન-૧ ની પરીક્ષા ૨૧, ૨૨, ૨૩, ૨૪, ૨૮ અને ૨૯ જાન્યુઆરી, ૨૦૨૬ દરમિયાન લેવામાં આવી હતી. આ પરીક્ષામાં કુલ ૧૩,૫૫,૨૯૩ ઉમેદવારોએ નોંધણી કરાવી હતી, જેમાંથી ૯૬.૨૬% એટલે કે ૧૩,૦૪,૬૫૩ વિદ્યાર્થીઓ પરીક્ષામાં હાજર રહ્યા હતા. ભારત ઉપરાંત વિદેશના ૧૫ શહેરો જેવા કે દુબઈ, દોહા, સિંગાપોર અને મસ્કતમાં પણ પરીક્ષા કેન્દ્રો ફાળવવામાં આવ્યા હતા.
દેશના ૧૦૦ પર્સન્ટાઈલ મેળવનાર ૧૨ મહારથીઓ:
આ વર્ષે ૧૦૦ પર્સન્ટાઈલ મેળવનાર વિદ્યાર્થીઓમાં રાજસ્થાનના સૌથી વધુ ૩ વિદ્યાર્થીઓ છે. આ યાદીમાં શ્રેયસ મિશ્રા (દિલ્હી), નરેન્દ્રબાબુ ગારી મહીથ (આંધ્રપ્રદેશ), શુભમ કુમાર (બિહાર), કબીર છિલ્લર (રાજસ્થાન), ચિરંજીબ કર (રાજસ્થાન), ભાવેશ પાત્રા (ઓડિશા), અનય જૈન (હરિયાણા), અર્ણવ ગૌતમ (રાજસ્થાન), પસલા મોહિત (આંધ્રપ્રદેશ), માધવ વિરાડિયા (મહારાષ્ટ્ર), પુરોહિત નિમય (ગુજરાત) અને વિવાન શરદ મહેશ્વરી (તેલંગાણા) નો સમાવેશ થાય છે.
કેટેગરી વાઈઝ અને સ્ટેટ ટોપર્સ:
 * ગુજરાત ટોપર: પુરોહિત નિમય (૧૦૦ પર્સન્ટાઈલ)
 * ફીમેલ ટોપર: હરિયાણાની આશી ગ્રેવાલ ૯૯.૯૯૬૯૭૬૬ સ્કોર સાથે પ્રથમ રહી છે.
 * SC કેટેગરી: દેવા શ્રીવેધ (આંધ્રપ્રદેશ) ૯૯.૯૯૯૨૨૭૧ સ્કોર સાથે ટોપર.
 * ST કેટેગરી: દક્ષ સેહરા (રાજસ્થાન) ૯૯.૯૯૩૮૬૨૦ સ્કોર સાથે ટોપર.
 * Gen-EWS: શ્રેષ્ઠ જસોરિયા (રાજસ્થાન) ૯૯.૯૯૯૨૪૪૨ સ્કોર.
 * PwBD: અર્શ જૈન (મધ્યપ્રદેશ) ૯૯.૯૧૦૦૮૪૩ સ્કોર.
મૂલ્યાંકન પદ્ધતિ અને મહત્વના ફેરફારો:
એનટીએ દ્વારા બહાર પાડવામાં આવેલી ફાઈનલ આન્સર કીમાં કુલ ૯ પ્રશ્નો પડતા મુકવામાં આવ્યા છે. નિયમ મુજબ, જે પ્રશ્નો પડતા મુકાયા છે તેના પૂરેપૂરા ૪ ગુણ તે શિફ્ટમાં હાજર રહેલા તમામ વિદ્યાર્થીઓને આપવામાં આવ્યા છે. સાચા જવાબ માટે +૪ અને ખોટા જવાબ માટે -૧ ની નેગેટિવ માર્કિંગ પદ્ધતિ અમલી હતી. એનટીએ સ્પષ્ટતા કરી છે કે આ સ્કોર પર્સન્ટાઈલ આધારિત છે અને વિદ્યાર્થીઓના રક્ષણ માટે બાયોમેટ્રિક અને આધાર E-KYC જેવી આધુનિક પદ્ધતિઓનો ઉપયોગ કરવામાં આવ્યો હતો.
ગેરરીતિ સામે કડક કાર્યવાહી:
પરીક્ષા દરમિયાન ગેરરીતિ અથવા અનફેર મીન્સ (UFM) નો ઉપયોગ કરનારા ૬૮ વિદ્યાર્થીઓના પરિણામ એનટીએ દ્વારા રોકી દેવામાં આવ્યા છે. આ વિદ્યાર્થીઓના આઈડેન્ટિટી વેરિફિકેશનમાં વિસંગતતા જોવા મળી હતી. એજન્સીએ જણાવ્યું છે કે જે વિદ્યાર્થીઓ એક કરતા વધુ એપ્લિકેશન નંબર ધરાવતા હશે અથવા અન્ય કોઈ ગેરરીતિમાં પકડાશે તેમના પરિણામ રદ કરવામાં આવશે.
હવે પછીની પ્રક્રિયા:
વિદ્યાર્થીઓ પોતાનું સ્કોરકાર્ડ સત્તાવાર વેબસાઈટ jeemain.nta.nic.in પરથી ડાઉનલોડ કરી શકશે. આ સ્કોરના આધારે NIT, IIIT અને GFTI જેવી સંસ્થાઓમાં પ્રવેશ મળશે. આ ઉપરાંત, જેઈઈ મેઈનના ટોચના ૨,૫૦,૦૦૦ વિદ્યાર્થીઓ જેઈઈ એડવાન્સ્ડ પરીક્ષા આપવા માટે પાત્ર ઠરશે, જેના દ્વારા આઈઆઈટી (IIT) માં પ્રવેશ મેળવી શકાશે. ફાઈનલ રેન્ક બંને સેશનના શ્રેષ્ઠ સ્કોરને ધ્યાનમાં લઈને જાહેર કરવામાં આવશે.