ગોપાલગંજ: બિહારના ગોપાલગંજ જિલ્લામાં આજે ત્યારે સનસનાટી મચી ગઈ જ્યારે નેશનલ ઇન્વેસ્ટિગેશન એજન્સી (NIA) અને બિહાર એન્ટી ટેરરિઝમ સ્ક્વોડ (ATS)ની ટીમોએ સંયુક્ત રીતે ત્રાટકીને એક મોટું ઓપરેશન પાર પાડ્યું. સિધવાલિયા પોલીસ સ્ટેશન વિસ્તારમાં આવેલા એક એન્જિનિયરના નિવાસસ્થાને ટીમે દરોડો પાડીને કલાકો સુધી તપાસનો ધમધમાટ ચલાવ્યો હતો.
   પ્રાપ્ત વિગતો અનુસાર તપાસ એજન્સીઓને કોઈ ચોક્કસ ઇનપુટ મળ્યા હતા, જેના આધારે આ કાર્યવાહી કરવામાં આવી હતી. આશરે 3 કલાક સુધી ચાલેલી આ પૂછપરછ દરમિયાન એન્જિનિયરના મોબાઈલ ફોન, લેપટોપ અને પર્સનલ કોમ્પ્યુટરની ઝીણવટભરી તપાસ કરવામાં આવી હતી. ટીમે સ્થળ પરથી કેટલાક મહત્વના દસ્તાવેજો અને ડિજિટલ પુરાવા પણ એકત્રિત કર્યા છે, જે આગામી સમયમાં મોટા ખુલાસા કરી શકે છે.
   NIA અને ATSના ઉચ્ચ અધિકારીઓએ એન્જિનિયરની સઘન પૂછપરછ કરી હતી. જોકે, લાંબી તપાસ અને નિવેદનો નોંધ્યા બાદ એન્જિનિયરને હાલ પૂરતો છોડી દેવામાં આવ્યો છે. પરંતુ એજન્સીઓએ તેના ઈલેક્ટ્રોનિક ગેજેટ્સને વધુ ફોરેન્સિક તપાસ માટે પોતાની સાથે રાખ્યા છે. આ ઓપરેશન કયા કેસના સંદર્ભમાં હતું, તે અંગે હજુ સુધી કોઈ સત્તાવાર જાહેરાત કરવામાં આવી નથી, પરંતુ સૂત્રોનું માનીએ તો આ મામલો આંતરરાષ્ટ્રીય કનેક્શન અથવા કોઈ ગંભીર સાયબર લિંક સાથે જોડાયેલો હોઈ શકે છે.
  સ્થાનિક રહેવાસીઓમાં આ દરોડાને લઈને ભારે કુતૂહલ અને ડરનો માહોલ છે. શાંત ગણાતા ગોપાલગંજના સિધવાલિયામાં અચાનક કેન્દ્રીય તપાસ એજન્સીઓની એન્ટ્રીએ સાબિત કરી દીધું છે કે સુરક્ષા એજન્સીઓ બિહારના અંતરિયાળ વિસ્તારોમાં છુપાયેલા સંદિગ્ધ તત્વો પર બાજ નજર રાખી રહી છે.