(વિનોદ ગાલા દ્વારા) ભુજ :ઉત્તરપ્રદેશના રાજ્યપાલ અને ગુજરાતના પૂર્વ મુખ્યમંત્રી આનંદીબેન પટેલ લાંબા સમય બાદ કચ્છના પ્રવાસે પધાર્યા છે. પ્રવાસ દરમિયાન આજે તેમણે કચ્છના રણમાં સ્થિત વિશ્વ પ્રસિદ્ધ હડપ્પન સંસ્કૃતિના અવશેષો ધરાવતા ધોળાવીરા અને કુદરતી સૌંદર્યથી ભરપૂર 'રોડ ટુ હેવન'ની મુલાકાત લીધી હતી. સરહદી જિલ્લાની મુલાકાત દરમિયાન તેમણે રાષ્ટ્રીય સુરક્ષા અને વહીવટી કામગીરીમાં રસ દાખવી બાલાસર પોલીસ મથકની પણ મુલાકાત લીધી હતી.
સિંધુ સંસ્કૃતિ અને પ્રાકૃતિક સૌંદર્યનો લ્હાવો:
રાજ્યપાલ આનંદીબેન પટેલે ધોળાવીરા ખાતે પ્રાચીન સિંધુ ખીણની સંસ્કૃતિના અવશેષોનું ઝીણવટભર્યું અવલોકન કર્યું હતું. હજારો વર્ષ જૂની આ સંસ્કૃતિની નગર રચના અને જળ સંચય પદ્ધતિ નિહાળી તેઓ અભિભૂત થયા હતા. ત્યારબાદ, ખાવડા-ધોળાવીરાને જોડતા અને પ્રવાસીઓમાં આકર્ષણનું કેન્દ્ર બનેલા 'રોડ ટુ હેવન' પરથી પસાર થઈને તેમણે સફેદ રણ અને આસપાસના પ્રાકૃતિક સૌંદર્યનો આનંદ માણ્યો હતો.
બાલાસર પોલીસ સ્ટેશનની મુલાકાત અને સમીક્ષા:
ધોળાવીરાની મુલાકાત બાદ તેઓ પૂર્વ કચ્છના સરહદી વિસ્તારમાં આવેલા બાલાસર પોલીસ સ્ટેશન પહોંચ્યા હતા. ત્યાં તેમણે પોલીસ તંત્રની કામગીરી નિહાળી હતી અને સરહદી વિસ્તારમાં કાયદો તથા વ્યવસ્થાની પરિસ્થિતિ અંગે જરૂરી માહિતી મેળવી હતી. મહિલા સશક્તિકરણ અને વહીવટી ક્ષમતાના આગ્રહી એવા આનંદીબેન પટેલે પોલીસ સ્ટેશનના જવાનો સાથે સંવાદ કરી પ્રોત્સાહન પૂરું પાડ્યું હતું.
ઉચ્ચ અધિકારીઓની ઉપસ્થિતિ:
આ પ્રવાસ દરમિયાન રાજ્યપાલ સાથે વહીવટી અને પોલીસ તંત્રનો મોટો કાફલો જોડાયો હતો. જેમાં ગાંધીધામના નાયબ પોલીસ અધિક્ષક એ.વી. રાજગોર, ભચાઉ પ્રાંત અધિકારી જે.આર. ગોહિલ, ભચાઉ મામલતદાર એમ.કે. રાજપૂત, પીઆઈ એમ.એન. દવે, પીઆઈ વી.આર. પટેલ, પીઆઈ વી.એ. સેગલ તેમજ પીએસઆઈ ડી.જે. પ્રજાપતિ અને બાલાસર પીએસઆઈ વી.એ. ઝા સહિતના અધિકારીઓ સુરક્ષા અને વ્યવસ્થાના ભાગરૂપે હાજર રહ્યા હતા.
લાંબા ગાળા બાદ કચ્છની ધરતી પર આવેલા પૂર્વ મુખ્યમંત્રીની આ મુલાકાતને લઈને સ્થાનિક વહીવટી તંત્ર દ્વારા ચુસ્ત બંદોબસ્ત અને તમામ વ્યવસ્થાઓ ગોઠવવામાં આવી હતી. મુલાકાતના અંતે તેમણે કચ્છના બદલાયેલા વિકાસ અને પ્રવાસન ક્ષેત્રે થયેલી પ્રગતિની પણ સરાહના કરી હતી. (તસ્વીરો: મુકેશ રાજગોર, રાપર)