ઇઝરાયલી ટૂરિસ્ટ સાથે બર્બરતા કરનારા ૩ આરોપીઓને ફાંસીની સજા
હમ્પીના ગેન્ગરેપ અને મર્ડર કેસમાં ઐતિહાસિક નિર્ણય
ગંગાવતી, તા.૧૭: કર્ણાટકમાં એક વિદેશી મહિલા સાથે થયેલી બર્બરતા અને હત્યાના મામલે ગઈ કાલે ગંગાવતી સિવિલ કોર્ટે આરોપીઓને આ જઘન્ય અપરાધને ‘રૅરેસ્ટ ઑફ ધ રૅર' શ્રેણીમાં રાખીને ત્રણ દોષીઓને મોતની સજા સંભળાવી હતી. આ ઘટના આંતરરાષ્ટ્રીય સ્તરે ચર્ચામાં આવી હતી એટલું જ નહીં, એનાથી ઇન્ટરનૅશનલ પર્યટકો પર પણ અસર થઈ હતી.
કોપ્પલ જિલ્લાના હમ્પીમાં ઇઝરાયલી મહિલા સાથે ગૅન્ગરેપ અને એક યુવકની હત્યાના મામલે ગઈ કાલે કોર્ટે ઐતિહાસિક નિર્ણય સંભળાવ્યો હતો. આ ઘટના ૨૦૨૫ની છઠ્ઠી માર્ચે હમ્પીના સનાપુર પાસે બની હતી. ગંગાવતી સિવિલ કોર્ટના જજ સદાનંદ નાગપ્પા નાઈકે મલ્લેશ ઉર્ફે હાંડી મલ્લા, શરણબસવ અને ચૈતન્ય સાઈ નામના ત્રણ યુવાનોને દોષી ઠરાવીને મોતની સજા સંભળાવી હતી. ૭ ફેબ્રુઆરીએ તેમને દોષી ઠેરવવામાં આવ્યા હતા અને ગઈ કાલે તેમની સજા નક્કી કરવામાં આવી હતી.
એક હોમસ્ટે માલિક મહારાષ્ટ્રના પંકજ, ઓડિશાના બિભાસ, અમેરિકાના ડૅનિયલ અને એક ઇઝરાયલી મહિલાને તુંગભદ્રા નહેર પાસે લઈ ગયો હતો. એ લોકો ત્યાં તારા જોવા ગયાં હતાં. એ રાતે લગભગ ૧૦.૩૦ વાગ્યે ત્રણ બાઇકસવારો ત્યાં પહોંચ્યા હતા. આરોપીઓએ પહેલાં તેમની સાથે પૈસાને લઈને ઝઘડો કર્યો હતો અને પછી તેમણે ત્રણેય પુરુષોને નહેરમાં ધકેલી દીધા અને તેમને પથ્થર માર્યા હતા. એમાં ઓડિશાના બિભાસકુમારનું મળત્યુ થયું હતું જ્યારે ડૅનિયલ અને પંકજનો જીવ બચી ગયો હતો.
એ પછી આરોપીએ ઇઝરાયલી મહિલા પર ગૅન્ગરેપ કર્યો હતો અને પછી તેને લૂંટીને ફરાર થઈ ગયા હતા. પોલીસે આ ત્રણેય આરોપીઓ પર માત્ર રેપ અને મર્ડરની જ નહીં; પરંતુ હત્યાની કોશિશ, ડકૈતી અને ધાકધમકીની કલમ પણ લગાવી હતી.
(2:39 PM IST)
છેલ્લા 8 દિવસમાં સૌથી લોકપ્રિય 
