રાજકોટ: તા.૧૭ વિદેશમાં સ્થાયી થયેલા ભારતીયો (NRIs) હવે બીમારીના સમયે માત્ર ઘરની યાદમાં જ નહીં, પરંતુ સસ્તી અને શ્રેષ્ઠ સારવાર માટે પણ ભારત તરફ વળી રહ્યા છે. તાજેતરના ડેટા મુજબ, અમેરિકા, યુરોપ અને ગલ્ફ દેશોમાં વસતા ભારતીયોમાં વતનમાં આવીને સારવાર કરાવવાનો અને ભારતીય હેલ્થ ઇન્શ્યોરન્સ લેવાનો ટ્રેન્ડ ઝડપથી વધી રહ્યો છે. ગત વર્ષની સરખામણીએ NRIs દ્વારા લેવાતી હેલ્થ પોલિસીમાં ૧૨૬% નો જંગી વધારો નોંધાયો છે.
ખર્ચમાં મોટો તફાવત અને વીમાનો લાભ
ખાડી દેશો (UAE, સાઉદી અરેબિયા)માં જે હેલ્થ પ્લાન માટે ૨,૦૦૦ થી ૩,૦૦૦ ડોલર ખર્ચવા પડે છે, તેની સામે ભારતમાં માત્ર ૧૨૦ થી ૩૦૦ ડોલરમાં શ્રેષ્ઠ કવરેજ મળી રહે છે. આ સિવાય, ભારત સરકાર દ્વારા અપાતી GST મુક્તિ અને વીમા કંપનીઓ દ્વારા અપાતું ૪૦% સુધીનું ઓછું પ્રીમિયમ NRIs ને આકર્ષી રહ્યું છે. ખાસ કરીને હૃદયની સર્જરી કે ઘૂંટણના રિપ્લેસમેન્ટ જેવી મોટી પ્રક્રિયાઓ ભારતમાં વિદેશ કરતા ૭૦% થી ૮૦% સસ્તી પડે છે.
માતા-પિતાની ચિંતા અને ‘ફેમિલી ફ્લોટર’નો ક્રેઝ
વિદેશમાં રહેતા ભારતીયો માટે વતનમાં એકલા રહેતા વૃદ્ધ માતા-પિતાની તબિયત હંમેશા ચિંતાનો વિષય હોય છે. આ જ કારણ છે કે ‘પેરેંટલ પોલિસી’માં ૬૦% અને ‘ફેમિલી ફ્લોટર’ પ્લાનમાં ૭૦% નો વધારો થયો છે. નવી પોલિસીઓમાં હવે ‘દ્વારપાલ સહાય’ (Concierge Assistance) જેવી સુવિધાઓ મળે છે, જેના દ્વારા વિદેશ બેઠા જ માતા-પિતા માટે હોસ્પિટલની એપોઈન્ટમેન્ટ કે સારવારનું સંચાલન કરી શકાય છે.
ટેકનોલોજી અને ઝડપી સારવાર
યુરોપ જેવા દેશોમાં બિન-કટોકટીની સર્જરી માટે લાંબો સમય રાહ જોવી પડે છે, જ્યારે ભારતીય ખાનગી હોસ્પિટલોમાં નિષ્ણાત ડોક્ટરોની સલાહ અને સર્જરી ખૂબ ઝડપથી ઉપલબ્ધ થાય છે. AI-આધારિત ટેલિ-મેડિકલ ચેક-અપ અને ડિજિટલ ઓનબોર્ડિંગને કારણે હવે સાત સમંદર પાર બેઠા પણ વીમો ખરીદવો અને ક્લેમ કરવો સરળ બન્યો છે.
લાંબા ગાળાનું આયોજન
માત્ર ઇમરજન્સી જ નહીં, પણ હવે NRIs વાર્ષિક મેડિકલ ચેક-અપ અને દાંતની સારવાર (OPD) માટે પણ ભારતની મુલાકાત લે છે. ફુગાવાને ધ્યાનમાં રાખીને ૭૦% ગ્રાહકો હવે ૨૫ લાખથી વધુની વીમા રકમ (Sum Insured) પસંદ કરી રહ્યા છે અને દર વર્ષે રિન્યુઅલની ઝંઝટમાંથી બચવા માટે ૨ થી ૩ વર્ષ માટે પ્રીમિયમ એડવાન્સમાં ભરી રહ્યા છે.