નવી દિલ્હી: તા.૧૭ આજકાલ સોશિયલ મીડિયા પર ફેમસ થવા માટે રીલ્સ બનાવવાનું ભૂત યુવા પેઢી પર એ રીતે સવાર થયું છે કે તેઓ બીજાના જીવની પણ પરવા કરતા નથી. દિલ્હીના દ્વારકા વિસ્તારમાં ૩ ફેબ્રુઆરીના રોજ થયેલા ભયાનક અકસ્માતનો એક નવો વીડિયો સામે આવ્યો છે, જે સાબિત કરે છે કે આ અકસ્માત માત્ર એક ભૂલ નહીં પણ ‘રીલ્સના વ્યસન’નું પરિણામ હતું. આ અકસ્માતમાં ૨૩ વર્ષીય સાહિલ ધનેશરાએ પોતાનો જીવ ગુમાવ્યો હતો.
સ્કોર્પિયોની અંદરથી જ શૂટ થયો હતો મોતનો વીડિયો
સામે આવેલા નવા વીડિયોમાં જોઈ શકાય છે કે એક સગીર છોકરો સ્કોર્પિયો SUV અત્યંત તેજ ગતિએ ચલાવી રહ્યો છે. વાહનની આગળની સીટ પર તેની બહેન બેઠી છે, જે હાથમાં પર્સ રાખીને મોબાઈલથી વીડિયો શૂટ કરી રહી છે. વીડિયોમાં સ્પષ્ટ દેખાય છે કે ડિવાઈડર વગરના રસ્તા પર આ બેફામ ગાડી એક બસને અથડાતા માંડ બચે છે. આ જ મસ્તી અને વીડિયો બનાવવાની લ્હાયમાં સાહિલની મોટરસાઇકલ અને અન્ય ટેક્સી સાથે આ સ્કોર્પિયોની જોરદાર ટક્કર થઈ હતી.
પોસ્ટમોર્ટમ રિપોર્ટ: સાહિલના શરીરના અંગો ચીરાઈ ગયા હતા
સાહિલના પોસ્ટમોર્ટમ રિપોર્ટમાં અકસ્માતની ભયાનકતાના એવા ખુલાસા થયા છે જે વાંચીને કાળજું ધ્રૂજી ઉઠે. રિપોર્ટ અનુસાર:
•    હેમરેજિક શોક: સાહિલનું મૃત્યુ વધુ પડતા રક્તસ્ત્રાવને કારણે થયું હતું.
•    ખોપરીમાં ફ્રેક્ચર: માથાની ડાબી બાજુએ ખોપરીમાં ગંભીર ફ્રેક્ચર હતું અને મગજમાં લોહીના ગંઠાવા (Hematoma) જામી ગયા હતા.
•    આંતરિક ઇજાઓ: તેની ચોથી, પાંચમી અને છઠ્ઠી પાંસળીઓ તૂટી ગઈ હતી. ફેફસાં અને મગજમાં સોજો આવી ગયો હતો અને ફેફસાના પટલમાં ૧૦૦ મિલીલીટર લોહી ભરાઈ ગયું હતું.
"હું નહોતી ઈચ્છતી કે તે આ દેશમાં રહે..." > પુત્રના મોત બાદ સાહિલની માતાના આ શબ્દો આખી સિસ્ટમ અને કાયદા સામે સવાલ ઉભા કરી રહ્યા છે. સોશિયલ મીડિયા પર ન્યાયની ગુહાર લગાવી રહેલી માતાની વેદના જોઈ પથ્થર દિલના માણસની આંખમાં પણ આંસુ આવી જાય તેમ છે.
તપાસનો નવો વળાંક
પોલીસ હવે આ નવા વીડિયોને પુરાવા તરીકે તપાસમાં સામેલ કરશે. અકસ્માત સમયે વાહનની ચોક્કસ સ્પીડ કેટલી હતી અને સગીર ડ્રાઈવરને ગાડી કેમ આપવામાં આવી, તે દિશામાં તપાસ તેજ કરવામાં આવી છે. આ ઘટના ફરી એકવાર લાલબત્તી સમાન છે કે વાલીઓએ પોતાના સગીર સંતાનોને વાહન આપતા પહેલા સો વાર વિચારવું જોઈએ.