નવી દિલ્હી :  ટ્રેનમાં મુસાફરી કરતી વખતે ઊંઘમાં સ્ટેશન ચૂકી જવાનો ડર હવે ભૂતકાળ બની જશે. ભારતીય રેલવેએ મુસાફરોની આ વર્ષો જૂની સમસ્યાનો અંત લાવવા માટે 'ડેસ્ટિનેશન એલર્ટ' અને 'વેક-અપ એલાર્મ' નામની અત્યાધુનિક સેવા શરૂ કરી છે. ઘણીવાર રાત્રિના સમયે ગાઢ ઊંઘને કારણે મુસાફરો પોતાનું ગંતવ્ય સ્ટેશન ચૂકી જતા હોય છે અને પછી મુશ્કેલીમાં મુકાતા હોય છે. પરંતુ હવે IRCTC ની આ નવી સિસ્ટમ તમારી ટ્રેન જેવી નિર્ધારિત સ્ટેશનથી ૨૦ મિનિટ દૂર હશે, કે તરત જ તમારા મોબાઈલ પર કોલ કે મેસેજ દ્વારા એલાર્મ વગાડશે. આ સુવિધા ખાસ કરીને વરિષ્ઠ નાગરિકો અને એકલા મુસાફરી કરતા લોકો માટે આશીર્વાદરૂપ સાબિત થશે.

આ સેવાની સૌથી મોટી ખાસિયત એ છે કે તે ઇન્ટરનેટ પર નિર્ભર નથી. એટલે કે, જો તમે ટ્રેનમાં મુસાફરી કરી રહ્યા હોવ અને નેટવર્ક નબળું હોય અથવા તમારો ડેટા પેક ખતમ થઈ ગયો હોય, તો પણ આ એલાર્મ કામ કરશે. આ સુવિધાનો લાભ લેવા માટે મુસાફરે માત્ર 139 નંબર પર કોલ કરવાનો રહેશે. ભાષા પસંદ કર્યા બાદ મેનૂમાંથી ૭ નંબરનો વિકલ્પ પસંદ કરી પોતાનો ૧૦ આંકડાનો PNR નંબર દાખલ કરવાનો રહેશે. કન્ફર્મેશન મળતાની સાથે જ રેલવેની સિસ્ટમ તમારી મુસાફરી પર નજર રાખશે અને સ્ટેશન આવતા પહેલા તમને જગાડી દેશે. આ સેવા માટે રેલવે દ્વારા માત્ર ₹૩ થી ₹૧૦ જેવો નજીવો ચાર્જ વસૂલવામાં આવે છે, જે તમારા મોબાઈલ બેલેન્સમાંથી કપાશે.

રેલવેની આ ટેકનોલોજી માત્ર સમયની જ બચત નથી કરતી, પણ મુસાફરોને માનસિક શાંતિ પણ આપે છે. હવે તમારે વારંવાર ગૂગલ મેપ્સ ચેક કરવાની કે બારીની બહાર ડોકિયું કરવાની જરૂર નથી. બીજી તરફ, મુસાફરો માટે એક મહત્વની સૂચના એ પણ છે કે ૧૮ થી ૨૦ ફેબ્રુઆરી દરમિયાન સતત બેંક રજાઓ આવી રહી છે, તેથી તમારી મુસાફરી દરમિયાન રોકડની જરૂરિયાત હોય તો અગાઉથી આયોજન કરી લેવું હિતાવહ છે. રેલવે હવે ટેકનોલોજીના માધ્યમથી મુસાફરીને વધુ સુરક્ષિત અને આરામદાયક બનાવી રહી છે, જે ડિજિટલ ઇન્ડિયાની દિશામાં એક મોટું પગલું છે.