મુંબઈ: મુંબઈના સાંતાક્રુઝ વિસ્તારમાં રવિવારે રાત્રે એક કાળજું ચીરી નાખતો અકસ્માત સર્જાયો હતો. શહેરની જીવાદોરી ગણાતી બેસ્ટ (BEST) બસે એક ૩૦ વર્ષીય ટુ-વ્હીલર સવારને અડફેટે લેતા તેનું મોત નીપજ્યું છે. મૃતકની ઓળખ અરુણ ત્રિપાઠી ઉર્ફે તિવારી તરીકે થઈ છે, જે પોતે કેટરિંગ અને વાસણોનો વ્યવસાય કરતો હતો.
ગેરસમજ બની મોતનું કારણ
પોલીસ તપાસમાં બહાર આવ્યું છે કે અકસ્માત રવિવારે રાત્રે ૯:૩૦ થી ૧૦ વાગ્યાની વચ્ચે મુંબઈ યુનિવર્સિટી ગેટ પાસે થયો હતો. અરુણ જ્યારે પોતાની બાઈક પર પસાર થઈ રહ્યો હતો, ત્યારે તેની આગળ એક બેસ્ટ બસ ઉભી હતી. યુનિવર્સિટી બસ સ્ટોપ પરથી જ્યારે બસ ઉપડી, ત્યારે અરુણે ડાબી તરફ વળાંક લેવાનો પ્રયાસ કર્યો અને બસ ડ્રાઈવરે જમણી તરફ વાહન લીધું. બંને વચ્ચે થયેલી આ ગેરસમજમાં અરુણની બાઈક સ્લિપ થઈ અને તે સીધો બસના આગળના જમણા ટાયર નીચે આવી ગયો હતો.
 
મૃત્યુ પહેલા સંબંધીઓને કર્યો ફોન
અકસ્માત એટલો ભયાનક હતો કે અરુણના બંને પગ ટાયર નીચે કચડાઈ ગયા હતા અને ભારે રક્તસ્ત્રાવ થઈ રહ્યો હતો. ગંભીર રીતે ઘાયલ હોવા છતાં, અરુણે હિંમત હાર્યા વગર પોતાના મોબાઈલ ફોનથી સ્વજનોને અકસ્માતની જાણ કરી હતી. પરિવારજનો તાત્કાલિક ઘટનાસ્થળે દોડી આવ્યા હતા અને તેને પહેલા વી.એન. દેસાઈ હોસ્પિટલ અને ત્યારબાદ બાંદ્રાની લીલાવતી હોસ્પિટલમાં ખસેડ્યો હતો, પરંતુ કમનસીબે સારવાર દરમિયાન તેણે જીવ ગુમાવ્યો હતો.
 
ડ્રાઈવર સામે ગુનો દાખલ
અકસ્માત સમયે ૩૦૨ નંબરની બેસ્ટ બસ પ્રતિક્ષા નગરથી ધારાવી જઈ રહી હતી. બીકેસી પોલીસે આ મામલે ત્વરિત કાર્યવાહી કરતા ૪૦ વર્ષીય બસ ડ્રાઈવર હરીશ નારાયણકરની ધરપકડ કરી છે. ડ્રાઈવર સામે ભારતીય ન્યાય સંહિતાની કલમ ૧૦૬ (બેદરકારીથી મૃત્યુ) અને ૨૮૧ (બેફામ વાહન ચલાવવું) હેઠળ ગુનો નોંધી વધુ તપાસ હાથ ધરવામાં આવી છે.
આ ઘટનાએ મુંબઈના રસ્તાઓ પર ટુ-વ્હીલર સવારોની સુરક્ષા અને ભારે વાહનોના ડ્રાઈવરોની સતર્કતા પર ફરી એકવાર સવાલો ઊભા કર્યા છે.