બેંગલુરુ: કર્ણાટક કોંગ્રેસમાં મુખ્યમંત્રીની ખુરશીને લઈને ચાલી રહેલી ખેંચતાણ હવે 'પ્રાણી સંગ્રહાલય'ના સ્તરે પહોંચી ગઈ હોય તેવું લાગે છે. રાજ્યના સમાજ કલ્યાણ મંત્રી એચ.સી. મહાદેવપ્પાએ નેતૃત્વ પરિવર્તનની માંગ કરી રહેલા પોતાની જ પાર્ટીના નારાજ નેતાઓ પર આકરા પ્રહારો કર્યા છે. તેમણે એક રહસ્યમય અને વિવાદાસ્પદ ઉપમા આપતા પૂછ્યું કે, "શું ક્યારેય પૂંછડી કૂતરાને હલાવી શકે?"
હાઈકમાન્ડ સર્વોપરી, ધારાસભ્યો નહીં!
મહાદેવપ્પાએ સ્પષ્ટ શબ્દોમાં જણાવ્યું હતું કે કર્ણાટકમાં નેતૃત્વ મજબૂત છે અને મુખ્યમંત્રી બદલવાનો કોઈ પ્રશ્ન જ ઊભો થતો નથી. જ્યારે પત્રકારોએ તેમને પૂછ્યું કે કેટલાક મંત્રીઓ અને ધારાસભ્યો હાઈકમાન્ડ પાસે દખલગીરીની માંગ કરી રહ્યા છે, ત્યારે તેમણે વળતો પ્રહાર કરતા કહ્યું, "હાઈકમાન્ડ આપણને નિર્દેશ આપે, આપણે હાઈકમાન્ડને નહીં. જે નેતાઓ બળવો કરી રહ્યા છે તે પૂંછડી સમાન છે અને પૂંછડી ક્યારેય કૂતરાને (પાર્ટી નેતૃત્વને) નિયંત્રિત કરી શકતી નથી."
 
રખડતા કૂતરાઓનો ઉલ્લેખ અને તીખો કટાક્ષ
ચર્ચામાં વધુ ઘી હોમતા મહાદેવપ્પાએ રખડતા કૂતરાઓ પરના તાજેતરના હાઈકોર્ટના આદેશનો પણ ઉલ્લેખ કર્યો. તેમણે કહ્યું કે અધિકારીઓને રખડતા કૂતરાઓને પકડીને આશ્રયસ્થાનોમાં રાખવા જોઈએ. જ્યારે મીડિયાએ પૂછ્યું કે શું તેઓ આ સરખામણી નેતૃત્વ પરિવર્તનની વાત કરતા નેતાઓ સાથે કરી રહ્યા છે, ત્યારે તેમણે મર્મમાં હસીને કહ્યું, "હું તો ફક્ત કોર્ટના આદેશની વાત કરું છું, વિશ્લેષણ કરવાનું કામ તમારું છે."
 
સિદ્ધારમૈયા vs શિવકુમાર: જંગ યથાવત
કર્ણાટકમાં છેલ્લા ઘણા સમયથી મુખ્યમંત્રી સિદ્ધારમૈયા અને નાયબ મુખ્યમંત્રી ડી.કે. શિવકુમાર વચ્ચે સત્તાની વહેંચણીને લઈને અટકળો ચાલી રહી છે. સિદ્ધારમૈયાના કટ્ટર સમર્થક એવા મહાદેવપ્પા સતત તેમના રાજીનામાની વાતોને નકારી રહ્યા છે. બીજી તરફ, ડી.કે. શિવકુમારે પણ તાજેતરમાં રહસ્યમય રીતે કહ્યું હતું કે, "સમય બધું જ કહેશે, મેં સિદ્ધારમૈયા સાથે બંધ બારણે શું વાત કરી છે તે જાહેર ન કરી શકાય."
હાલ તો મહાદેવપ્પાના આ 'પૂંછડી અને કૂતરા'વાળા નિવેદને કર્ણાટક કોંગ્રેસમાં ભડકો કર્યો છે. હવે જોવાનું એ રહેશે કે નારાજ નેતાઓ આ અપમાનનો બદલો કેવી રીતે લે છે.