કોલકાતા:પશ્ચિમ બંગાળમાં આગામી વિધાનસભા ચૂંટણી પહેલા રાજકીય ગરમાવો ચરમસીમાએ પહોંચ્યો છે. મુખ્યમંત્રી મમતા બેનર્જીએ ચૂંટણી પંચ પર અત્યાર સુધીનો સૌથી આકરો હુમલો કર્યો છે. મતદાર યાદીના વિશેષ પુનરીક્ષણ (SIR) ની પ્રક્રિયા પર સવાલ ઉઠાવતા મમતાએ ચૂંટણી પંચને 'ટોર્ચર કમિશન' તરીકે ઓળખાવ્યું હતું. તેમણે પંચને પડકાર ફેંકતા કહ્યું કે, "જો તેઓ ૪૨૦ છે, તો હું ૪૪૦ વોલ્ટ છું."
 દીદીએ પંચની કાર્યપદ્ધતિને 'તુગલકી' અને 'હિટલરશાહી' જેવી ગણાવી હતી. તેમણે સવાલ ઉઠાવ્યો હતો કે, જો કોઈ દસ્તાવેજો બિહારમાં માન્ય રાખવામાં આવે છે, તો પછી બંગાળમાં તેને કેમ નકારી દેવામાં આવે છે? તેમણે આરોપ લગાવ્યો હતો કે પંચ જાણી જોઈને જિલ્લા અધિકારીઓ પર દબાણ બનાવી રહ્યું છે જેથી અમુક મતદારોના નામ યાદીમાંથી કાઢી શકાય. મમતાએ સ્પષ્ટ ચેતવણી આપી હતી કે જો કોઈ પણ માન્ય મતદારનું નામ યાદીમાંથી હટાવવામાં આવશે તો તેમની પાર્ટી ઉગ્ર વિરોધ કરશે.
 પશ્ચિમ બંગાળમાં જ્યારે પણ ચૂંટણી આવે છે ત્યારે મમતા બેનર્જી અને કેન્દ્રીય સંસ્થાઓ વચ્ચેનો સંઘર્ષ જાણીતો છે. આ વખતે મતદાર યાદીના મુદ્દાને મમતાએ બંગાળી અસ્મિતા અને લોકશાહીના અધિકારો સાથે જોડી દીધો છે. તેમણે પંચને પૂછ્યું કે, "શું કોઈ તુગલકી પંચ આવી રીતે લોકશાહી દેશમાં ચૂંટણી કરાવી શકે?" આ નિવેદન બાદ ભાજપ અને તૃણમૂલ કોંગ્રેસ વચ્ચે શાબ્દિક યુદ્ધ વધુ તેજ બન્યું છે.
 મમતા બેનર્જીએ આક્ષેપ કર્યો હતો કે ચૂંટણી પંચ નિષ્પક્ષ રહીને કામ કરવાને બદલે કેન્દ્ર સરકારના ઈશારે બંગાળના હિતોને નુકસાન પહોંચાડી રહ્યું છે. તેમણે કાર્યકર્તાઓને એકઠા થવા અને મતદાર યાદીની દરેક એન્ટ્રી પર નજર રાખવા આદેશ આપ્યો છે. બંગાળમાં આગામી દિવસોમાં ચૂંટણી પંચ વિરુદ્ધ તૃણમૂલ કોંગ્રેસના મોટા પાયે દેખાવો જોવા મળી શકે છે.
ચૂંટણી પંચે આ મામલે હજુ સુધી કોઈ સત્તાવાર પ્રતિક્રિયા આપી નથી, પરંતુ મમતા બેનર્જીના આ '૪૪૦ વોલ્ટ' ના ઝટકાએ દિલ્હી સુધી હલચલ મચાવી દીધી છે.