નવી દિલ્હી:પાકિસ્તાનના પૂર્વ વડાપ્રધાન અને વિશ્વ ક્રિકેટના મહાન ઓલરાઉન્ડરોમાં જેની ગણના થાય છે તેવા ઇમરાન ખાન અત્યારે જેલમાં કપરી સ્થિતિનો સામનો કરી રહ્યા છે. ઇમરાન ખાનની જેલમાં કથળતી જતી તબિયતને ધ્યાનમાં રાખીને ભારત સહિત વિશ્વના ૧૪ પૂર્વ આંતરરાષ્ટ્રીય કેપ્ટનોએ માનવતાવાદી અભિગમ અપનાવ્યો છે. આ દિગ્ગજોએ પાકિસ્તાન સરકાર અને વડાપ્રધાન શહેબાઝ શરીફને એક સંયુક્ત પત્ર લખીને ઇમરાન ખાનને તાત્કાલિક અને યોગ્ય તબીબી સુવિધા પૂરી પાડવા અપીલ કરી છે.
આ પત્ર પર હસ્તાક્ષર કરનારાઓમાં ભારતના લિટલ માસ્ટર સુનીલ ગાવસ્કર અને ૧૯૮૩ના વર્લ્ડ કપ વિજેતા કેપ્ટન કપિલ દેવના નામ મુખ્ય છે. મેદાન પર ભલે ભારત-પાકિસ્તાન વચ્ચે ગમે તેટલી ખેંચતાણ રહી હોય, પરંતુ એક સાથી ખેલાડીની નાજુક સ્થિતિ જોઈને ભારતીય દિગ્ગજોએ દરિયાદિલી બતાવી છે. પત્રમાં માંગ કરવામાં આવી છે કે ઇમરાન ખાનને જેલમાં પ્રાથમિક સુવિધાઓથી વંચિત ન રાખવામાં આવે અને નિષ્ણાત ડોક્ટરો દ્વારા તેમની તપાસ કરવામાં આવે.
માત્ર ભારત જ નહીં, પરંતુ ઓસ્ટ્રેલિયા, ઇંગ્લેન્ડ અને વેસ્ટ ઈન્ડિઝના પૂર્વ કેપ્ટનોએ પણ આ પત્ર પર સહી કરી છે. ક્રિકેટ જગતનું માનવું છે કે ૧૯૯૨માં પાકિસ્તાનને વર્લ્ડ કપ જીતાડનાર ખેલાડીનું સન્માન જળવાવું જોઈએ. પાકિસ્તાનમાં ચાલી રહેલા રાજકીય સંઘર્ષની વચ્ચે આંતરરાષ્ટ્રીય રમતવીરોનું આ રીતે એકજૂથ થવું એ પાકિસ્તાન સરકાર પર મોટું દબાણ ઊભું કરી શકે છે.
 આ સમાચાર વાયુવેગે ફેલાતા જ સોશિયલ મીડિયા પર ક્રિકેટ પ્રેમીઓએ આ પહેલને વધાવી લીધી છે. ફેન્સ કહી રહ્યા છે કે "રમત લોકોને જોડે છે, તોડતી નથી." અત્યારે ઇમરાન ખાન અનેક કાયદાકીય લડાઈ લડી રહ્યા છે, ત્યારે તેમના જૂના સાથીદારો અને પ્રતિસ્પર્ધી કેપ્ટનોએ તેમના સ્વાસ્થ્ય માટે અવાજ ઉઠાવીને રમતગમતની સાચી ભાવના પ્રદર્શિત કરી છે.
હવે જોવાનું એ રહેશે કે પાકિસ્તાન સરકાર વિશ્વના આ ૧૪ ‘લીજેન્ડ્સ’ના પત્રને કેટલી ગંભીરતાથી લે છે અને ઇમરાન ખાનને જરૂરી સારવાર પૂરી પાડવામાં આવે છે કે નહીં.