જેસલમેર:  રાજસ્થાનના જેસલમેરની પોખરણ ફિલ્ડ ફાયરિંગ રેન્જ ફરી એકવાર ઈતિહાસની સાક્ષી બનવા જઈ રહી છે. આગામી ૨૭ ફેબ્રુઆરી, ૨૦૨૬ના રોજ ભારતીય વાયુસેના (IAF) પોતાની લડાયક ક્ષમતાનું ભવ્ય પ્રદર્શન કરવા માટે સજ્જ થઈ છે, જેને 'વાયુશક્તિ-૨૦૨૬' નામ આપવામાં આવ્યું છે. આ કવાયત માત્ર એક પ્રદર્શન નથી, પરંતુ ભારતની વધતી જતી સૈન્ય તાકાત અને ટેકનોલોજીનું વિશ્વને દર્શન કરાવવાનું માધ્યમ છે.
આકાશમાં ગરુડની જેમ ત્રાટકશે રાફેલ અને તેજસ
આ કવાયતનું મુખ્ય આકર્ષણ ફ્રાન્સથી આવેલા ઘાતક રાફેલ અને ભારતનું પોતાનું ગૌરવ એવું સ્વદેશી તેજસ ફાઈટર એરક્રાફ્ટ રહેશે. વાયુસેનાના પાયલોટો દિવસ, સાંજ અને રાત્રિના ઘાટા અંધકારમાં પણ દુશ્મનના ઠેકાણાઓને પળવારમાં કેવી રીતે નેસ્તનાબૂદ કરી શકાય, તેનો જીવંત અને સચોટ અભ્યાસ કરશે. આ કવાયતમાં સુખોઈ-૩૦ MKI, મિરાજ-૨૦૦૦ અને મિગ-૨૯ જેવા ફ્રન્ટલાઈન એરક્રાફ્ટ પણ પોતાની તાકાત બતાવશે.
 
હેલિકોપ્ટર અને પરિવહન વિમાનોનો કાફલો
માત્ર લડાયક વિમાનો જ નહીં, પરંતુ દુનિયાના સૌથી આધુનિક એટેક હેલિકોપ્ટર અપાચે અને ભારે સામાન ઉઠાવતા ચિનૂક પણ રણમાં ધૂળ ઉડાડશે. ભારતનું સ્વદેશી લાઈટ કોમ્બેટ હેલિકોપ્ટર 'પ્રચંડ' અને એડવાન્સ લાઈટ હેલિકોપ્ટર 'ધ્રુવ' પણ આ અભ્યાસનો હિસ્સો હશે. આ ઉપરાંત, C-17 ગ્લોબમાસ્ટર અને સ્વદેશી C-295 વિમાનો આપત્તિના સમયે મદદ પહોંચાડવાની પોતાની ક્ષમતાનું પ્રદર્શન કરશે.
 
અભેદ્ય સ્વદેશી શસ્ત્ર પ્રણાલી
'વાયુશક્તિ-૨૦૨૬'માં ભારતની મિસાઈલ તાકાત પણ જોવા મળશે. સ્વદેશી આકાશ અને સ્પાઈડર મિસાઈલ સિસ્ટમ્સ દ્વારા આકાશી લક્ષ્યોને વીંધી નાખવાના પ્રયોગો થશે. આ વખતે ખાસ આકર્ષણ 'કેમિકેઝ' ડ્રોન (લોઇટરિંગ મ્યુનિશન) અને એન્ટી-ડ્રોન ટેકનોલોજી હશે, જે આજના આધુનિક યુદ્ધમાં નિર્ણાયક ભૂમિકા ભજવે છે.
વાયુસેનાના આ મહા-અભ્યાસથી પાકિસ્તાન અને ચીન સરહદ નજીક ભારતની વ્યૂહાત્મક પકડ વધુ મજબૂત થશે. સમગ્ર વિશ્વની નજર ૨૭ ફેબ્રુઆરીએ પોખરણ પર રહેશે, જ્યાં ભારતીય પાંખિયાઓ આકાશમાં શૌર્યની નવી ગાથા લખશે.