સોના અને ચાંદીના રોકાણકારો માટે મંગળવારની રાત આંચકા સમાન સાબિત થઈ છે. મલ્ટી કોમોડિટી એક્સચેન્જ પર ભાવમાં ભારે ઘટાડો નોંધાયો છે.

વૈશ્વિક બજારમાં વ્યાજદરો અને ડોલરની મજબૂતીને કારણે કીમતી ધાતુઓમાં ભારે વેચવાલી જોવા મળી રહી છે. મંગળવારની રાત્રે ભારતીય વાયદા બજાર એટલે કે મલ્ટી કોમોડિટી એક્સચેન્જ (એમસીએક્સ) પર સોના અને ચાંદીના ભાવમાં રાત્રે ૮:૩૦ વાગ્યાની આસપાસ જોરદાર કડાકો જોવા મળ્યો હતો. બજાર બંધ થયું ત્યારે ચાંદીમાં ૧૩,૦૦૦ રૂપિયાથી વધુ અને સોનામાં આશરે ૪,૦૦૦ રૂપિયાનો ઘટાડો નોંધાયો છે. મંગળવારની રાત્રે કોમોડિટી માર્કેટમાં અચાનક આવેલી વેચવાલીને કારણે ચાંદીના ભાવમાં ૫.૫૮ ટકાનો મોટો કડાકો બોલાયો છે. એમસીએક્સ પર ૫ માર્ચના વાયદા માટે ચાંદીની કિંમત ૧૩,૩૭૮ રૂપિયા ઘટીને ૨,૨૬,૫૧૩ રૂપિયા પ્રતિ કિલો પર પહોંચી ગઈ છે. બીજી તરફ, ૨ એપ્રિલના વાયદા માટે સોનાના ભાવમાં પણ ૨.૪૫ ટકા અથવા ૩,૭૯૬ રૂપિયાનો ઘટાડો જોવા મળ્યો છે, જેના કારણે સોનું ૧,૫૦,૯૬૪ રૂપિયા પ્રતિ ૧૦ ગ્રામના સ્તર પર આવી ગયું છે.

બજારના નિષ્ણાતોના મતે, આંતરરાષ્ટ્રીય સ્તરે સોનાનો હાજર ભાવ ૪,૯૨૦ ડોલરથી ૪,૯૫૦ ડોલર પ્રતિ ઔંસ અને ચાંદીનો ભાવ ૭૪ ડોલરથી ૭૫ ડોલર પ્રતિ ઔંસની આસપાસ ટ્રેડ થઈ રહ્યો છે. આ ઘટાડા પાછળનું મુખ્ય કારણ નફાખોરી (પ્રોફિટ બુકિંગ) અને ડોલરની મજબૂતી માનવામાં આવી રહી છે. સોના અને ચાંદીએ આ અઠવાડિયાનું સૌથી નબળું સ્તર સ્પર્શ્યું છે. ઉલ્લેખનીય છે કે, ૨૯ જાન્યુઆરીએ સોના અને ચાંદી બંનેએ સર્વોચ્ચ સપાટી સ્પર્શી હતી, ત્યાંથી અત્યાર સુધીમાં ભાવમાં ભારે ધોવાણ થયું છે. ચાંદી તેના ૪.૨૦ લાખના રેકોર્ડ હાઈ સ્તરથી ઘટીને ૨.૨૬ લાખ પર આવી ગઈ છે, જે ટોચથી ૧.૯૩ લાખથી વધુનો ઘટાડો દર્શાવે છે. સોના-ચાંદીના ભાવમાં આવેલી આ અચાનક ગિरावटને કારણે શેરબજારમાં ગોલ્ડ અને સિલ્વર ઈટીએફ (એક્સચેન્જ ટ્રેડેડ ફંડ્સ) ના ભાવ પણ પ્રભાવિત થઈ રહ્યા છે. રેકોર્ડ હાઈ સ્તરથી સિલ્વર ઈટીએફ ૪૦ ટકાથી વધુ અને ગોલ્ડ ઈટીએફ આશરે ૧૮ ટકા જેટલા તૂટી ચૂક્યા છે.*