અમદાવાદ : ભારતીય કોર્પોરેટ ઇતિહાસમાં અને વૈશ્વિક ટેકનોલોજીના નકશા પર એક નવો અધ્યાય લખતા અદાણી જૂથે આજે એક ક્રાંતિકારી જાહેરાત કરી છે. ભારતના ડિજિટલ ભવિષ્યને સુરક્ષિત કરવા અને દેશને આર્ટિફિશિયલ ઇન્ટેલિજન્સ (એઆઈ) ક્ષેત્રે આત્મનિર્ભર બનાવવા માટે અદાણી જૂથે ૨૦૩૫ સુધીમાં ૧૦૦ અબજ અમેરિકન ડોલર (આશરે ૮.૩૦ લાખ કરોડ રૂપિયાથી વધુ) નું જંગી સીધું રોકાણ કરવાની પ્રતિબદ્ધતા વ્યક્ત કરી છે. આ રોકાણ ભારત માટે 'સોવરેન એઆઈ' એટલે કે દેશની પોતાની માલિકીનું અને નિયંત્રણ હેઠળનું એઆઈ ઇન્ફ્રાસ્ટ્રક્ચર ઊભું કરવા માટે કરવામાં આવશે. આ પ્રોજેક્ટ ઉર્જા અને કોમ્પ્યુટિંગ ક્ષેત્રે વિશ્વના સૌથી મોટા સંકલિત રોકાણોમાંનું એક ગણવામાં આવે છે, જે ભારતને 'એઆઈ યુગ' માં એનર્જી-કોમ્પ્યુટ બેકબોન પૂરી પાડશે.

આ મહત્વાકાંક્ષી યોજના વિશે વાત કરતા અદાણી જૂથના ચેરમેન શ્રી ગૌતમભાઈ અદાણીએ જણાવ્યું હતું કે, "વિશ્વ અત્યારે ઔદ્યોગિક ક્રાંતિ કરતાં પણ વધુ ગહન અને પ્રભાવશાળી એવી 'ઇન્ટેલિજન્સ રિવોલ્યુશન' (બૌદ્ધિક ક્રાંતિ) માં પ્રવેશી રહ્યું છે. જે રાષ્ટ્રો ઉર્જા અને કોમ્પ્યુટિંગ વચ્ચેના સંતુલનમાં મહારત મેળવશે, તેઓ જ આગામી દાયકાને આકાર આપશે." તેમણે ઉમેર્યું હતું કે ભારત પાસે ગ્રીન એનર્જી અને ડેટા સેન્ટર્સનો મજબૂત પાયો છે, જેના કારણે ભારત નેતૃત્વ કરવા માટે અનોખી રીતે સક્ષમ છે. અદાણી જૂથનો ધ્યેય ભારતને એઆઈ યુગમાં માત્ર એક ઉપભોક્તા (કન્ઝ્યુમર) તરીકે નહીં, પરંતુ એક સર્જક (ક્રિએટર), બિલ્ડર અને ઇન્ટેલિજન્સના નિકાસકાર તરીકે સ્થાપિત કરવાનો છે.

૨૫૦ અબજ ડોલરની વિશાળ ઇકોસિસ્ટમ્સનું નિર્માણ

અદાણી જૂથ દ્વારા કરવામાં આવનારું ૧૦૦ અબજ ડોલરનું આ સીધું રોકાણ ભારતીય અર્થતંત્રમાં મોટા પાયે ગુણક અસર (મલ્ટિપ્લાયર ઇફેક્ટ) પેદા કરશે. અદાણી જૂથના અંદાજ મુજબ, આ રોકાણ સર્વર મેન્યુફેક્ચરિંગ, એડવાન્સ ઇલેક્ટ્રિકલ ઇન્ફ્રાસ્ટ્રક્ચર, સોવરેન ક્લાઉડ પ્લેટફોર્મ્સ અને તેને સંલગ્ન અન્ય ઉદ્યોગોમાં વધારાના ૧૫૦ અબજ ડોલરનું રોકાણ આકર્ષિત કરશે. આમ, આગામી એક દાયકામાં ભારતમાં કુલ ૨૫૦ અબજ ડોલરની એઆઈ ઇન્ફ્રાસ્ટ્રક્ચર ઇકોસિસ્ટમ તૈયાર થશે, જે રોજગારી અને ટેકનોલોજીકલ વિકાસની દ્રષ્ટિએ દેશનું ચિત્ર બદલી નાખશે.

ગ્રીન એનર્જી અને ડેટા સેન્ટર્સનો અનોખો સંગમ

એઆઈ ટેકનોલોજી માટે પુષ્કળ વીજળીની જરૂર પડે છે, અને પરંપરાગત વીજળીથી પર્યાવરણને નુકસાન થવાનો ભય રહેલો છે. આ સમસ્યાના ઉકેલ રૂપે અદાણી જૂથે આ તમામ ડેટા સેન્ટર્સને રિન્યુએબલ એનર્જી (પુનઃપ્રાપ્ય ઊર્જા) થી ચલાવવાનો નિર્ણય કર્યો છે. અદાણી ગ્રીન એનર્જીના ખાવડા સ્થિત ૩૦ ગીગાવોટના પ્રોજેક્ટમાંથી અત્યારે ૧૦ ગીગાવોટથી વધુ ક્ષમતા કાર્યરત થઈ ચૂકી છે, જે આ ડેટા સેન્ટર્સને કાર્બન-ન્યુટ્રલ પાવર પૂરો પાડશે. આ ઉપરાંત, જૂથ ૫૫ અબજ ડોલરનું રોકાણ કરીને તેના રિન્યુએબલ એનર્જી પોર્ટફોલિયોને વિસ્તારી રહ્યું છે, જેમાં વિશ્વની સૌથી મોટી બેટરી એનર્જી સ્ટોરેજ સિસ્ટમ્સ (બીઈએસએસ) નો પણ સમાવેશ થાય છે. આ વ્યૂહરચના ભારતને સ્પર્ધાત્મક ભાવે ગ્રીન પાવર પૂરો પાડવાની સ્થિતિમાં મૂકે છે.

ગૂગલ, માઈક્રોસોફ્ટ અને ફ્લિપકાર્ટ સાથે મોટી ભાગીદારી

આ મેગા પ્રોજેક્ટ હેઠળ 'અદાણી કનેક્સ' તેના વર્તમાન ૨ ગીગાવોટના નેશનલ ડેટા સેન્ટર પ્લેટફોર્મને વિસ્તારીને ૫ ગીગાવોટ સુધી લઈ જશે. જેમાં વૈશ્વિક ટેકનોલોજી દિગ્ગજો સાથે મહત્વપૂર્ણ કરારો કરવામાં આવ્યા છે.

૧. વિશાખાપટ્ટનમ: ગૂગલ સાથે મળીને દેશનું સૌથી મોટું 'ગીગાવોટ-સ્કેલ' એઆઈ ડેટા સેન્ટર કેમ્પસ સ્થાપવામાં આવશે.

૨. હૈદરાબાદ અને પુણે: માઈક્રોસોફ્ટ સાથે મળીને આ બંને શહેરોમાં ડેટા સેન્ટર્સનું વિસ્તરણ કરવામાં આવશે.

૩. નોઈડા: નોઈડામાં પણ એક વધારાનું વિશાળ ડેટા સેન્ટર કેમ્પસ સ્થાપવામાં આવશે.

૪. ફ્લિપકાર્ટ: ભારતીય ઈ-કોમર્સ કંપની ફ્લિપકાર્ટ સાથેની ભાગીદારી વધુ મજબૂત બનાવીને બીજા એઆઈ ડેટા સેન્ટરનો વિકાસ કરવામાં આવશે, જે ડિજિટલ કોમર્સ અને હાઈ-પરફોર્મન્સ કોમ્પ્યુટિંગને સપોર્ટ કરશે.

આત્મનિર્ભર સપ્લાય ચેઈન અને સ્થાનિક ઉત્પાદન

વૈશ્વિક બજારમાં સપ્લાય ચેઈનની અસ્થિરતા ઘટાડવા માટે, અદાણી જૂથ ક્રિટિકલ ઇન્ફ્રાસ્ટ્રક્ચર કમ્પોનન્ટ્સનું ઉત્પાદન ભારતમાં જ શરૂ કરશે. જેમાં હાઈ-કેપેસિટી ટ્રાન્સફોર્મર્સ, એડવાન્સ પાવર ઇલેક્ટ્રોનિક્સ, ગ્રીડ સિસ્ટમ્સ, ઇન્વર્ટર અને ઇન્ડસ્ટ્રીયલ થર્મલ મેનેજમેન્ટ સોલ્યુશન્સનો સમાવેશ થાય છે. આ અભિગમ ભારતને માત્ર ડેટા હબ જ નહીં, પરંતુ નેક્સ્ટ જનરેશન ઇન્ટેલિજન્સ અને કોમ્પ્યુટ ઇન્ફ્રાસ્ટ્રક્ચરના ઉત્પાદક અને નિકાસકાર તરીકે પણ સ્થાન અપાવશે.

વિદ્યાર્થીઓ અને સ્ટાર્ટઅપ્સ માટે જીપીયુની સુવિધા

ભારતમાં કોમ્પ્યુટિંગ પાવરની અછતને દૂર કરવા અને સ્થાનિક ઈનોવેશનને વેગ આપવા માટે અદાણી જૂથે ખૂબ જ મહત્વનો નિર્ણય લીધો છે. ભારતના પાંચ-સ્તરીય એઆઈ આર્કિટેક્ચર (એપ્લિકેશન્સ, મોડેલ્સ, ચિપ્સ, એનર્જી અને ડેટા સેન્ટર્સ) ને અનુરૂપ, જૂથ જીપીયુ (ગ્રાફિક્સ પ્રોસેસિંગ યુનિટ) ક્ષમતાનો એક નોંધપાત્ર હિસ્સો ખાસ ભારતીય એઆઈ સ્ટાર્ટઅપ્સ, સંશોધન સંસ્થાઓ અને ડીપ-ટેક ઉદ્યોગસાહસિકો માટે અનામત રાખશે. આનાથી દેશમાં સંશોધન અને વિકાસની ગતિ તેજ બનશે.

કૌશલ્ય વિકાસ અને રાષ્ટ્રીય પ્રાથમિકતાઓ સાથે જોડાણ

ભવિષ્યમાં એઆઈ ક્ષેત્રે કુશળ માનવબળની જરૂરિયાતને પહોંચી વળવા માટે અદાણી જૂથ અગ્રણી શૈક્ષણિક સંસ્થાઓ સાથે મળીને કામ કરશે. જેમાં એનર્જી અને લોજિસ્ટિક્સ પર કેન્દ્રિત 'એપ્લાઇડ એઆઈ રિસર્ચ લેબ્સ' અને વિશિષ્ટ એઆઈ ઇન્ફ્રાસ્ટ્રક્ચર એન્જિનિયરિંગ અભ્યાસક્રમો શરૂ કરવામાં આવશે. આ ઉપરાંત, પીએમ ગતિ શક્તિ કાર્યક્રમ સાથે સુમેળ સાધીને, અદાણી જૂથ તેના લોજિસ્ટિક્સ, બંદરો અને ઔદ્યોગિક કોરિડોરમાં 'એજન્ટિક એઆઈ' નો ઉપયોગ કરશે, જેથી સ્માર્ટ અને કાર્યક્ષમ કામગીરી થઈ શકે. આ વ્યૂહરચના માત્ર રાષ્ટ્રીય માળખાગત સુવિધાઓને આધુનિક બનાવશે જ નહીં, પરંતુ ડેટા સાર્વભૌમત્વ (ડેટા સોવરેન્ટી) પણ સુનિશ્ચિત કરશે.

આમ, ૨૦૩૫ સુધીનું આ વિઝન ભારતને વૈશ્વિક સ્તરે એઆઈ અર્થતંત્રના કેન્દ્રબિંદુ તરીકે સ્થાપિત કરશે. અદાણી જૂથે આ વૈશ્વિક ટેકનોલોજી કંપનીઓ, સાર્વભૌમ સંસ્થાઓ અને ઇનોવેશન પાર્ટનર્સને ભારતના આ નેક્સ્ટ જનરેશન એઆઈ ઇન્ફ્રાસ્ટ્રક્ચર પ્લેટફોર્મના નિર્માણમાં સહભાગી થવા આમંત્રણ આપ્યું છે. (વિનોદ ગાલા ભુજ અકિલા દ્વારા)