ગાંધીનગર, તા. ૧૮: પોલિસી ડ્રીવન સ્‍ટેટ તરીકે ગુજરાત સરકારે મહત્‍વપૂર્ણ નીતિઓ જાહેર કરેલ છે. જેમાં ગુજરાત સ્‍પેસટેક પોલિસી, ગુજરાત ઇલેકટ્રોનિક્‍સ કોમ્‍પોનન્‍ટ મેન્‍યુફેક્‍ચરીંગ પોલિસી, એકશન પ્‍લાન ફોર ઇમ્‍પલીમેન્‍ટેશન ઓફ AI, ઇન્‍ટીગ્રેડેટ રીન્‍યુએબલ એનર્જી પોલિસી અને ગુજરાત ગ્રીન હાઇડ્રોજન પોલિસીનો સમાવેશ થાય છે.

જેનાથી યુવા પ્રતિભાને AI આધારિત રિસર્ચ અને કુશળતા વિકસાવવામાં નવી તકો મળશે. સેમી કન્‍ડક્‍ટર્સ અને હાઇ વેલ્‍યુ મેન્‍યુફેક્‍ચરીંગમાં વધુ વેગ આવશે. કળષિ, આપત્તિ વ્‍યવસ્‍થાપન, શહેરી આયોજન અને ગવર્નન્‍સ વધુ અસરકારક બનશે. તેમજ રીન્‍યુએબલ એનર્જીનો મહત્તમ ઉપયોગ કરી કાર્બન ઉત્‍સર્જનમાં ઘટાડો થશે. જે ગુજરાતને આત્‍મનિર્ભર ભારત અને વિકસિત ગુજરાત@૨૦૪૭ના લક્ષ્યને સાકાર કરવામાં મદદરૂપ થશે.

રાજ્‍ય સરકારના આ પ્રયાસોથી ગુજરાતની આર્થિક ગતિશીલતા રાષ્‍ટ્રીય વિકાસમાં આગવી અને મહત્‍વપૂર્ણ ભૂમિકા ભજવી રહી છે. આજે દેશના જીડીપીમાં ગુજરાતનો ફાળો ૮.૨ ટકા છે. ગુજરાતની માથાદીઠ આવક રૂ. ૩ લાખ ૧ હજાર (રૂ. ૩,૦૧,૦૦૦) છે. જે રાષ્‍ટ્રીય સરેરાશ કરતાં ૬૦ ટકાથી વધારે છે. જેમાં ગુજરાત દેશના રાજ્‍યોમાં મોખરાનું સ્‍થાન ધરાવે છે.

GYAN એટલે કે, ગરીબ, યુવા, અન્નદાતા અને નારીશક્‍તિને વધુ સશક્‍ત બનાવવા આ બજેટમાં વિવિધ જોગવાઇઓ કરવામાં આવેલ છે.

એક કલ્‍યાણકારી રાજ્‍ય તરીકે ગરીબ અને મધ્‍યમ વર્ગના પરિવારોને પાકું ઘર આપી ‘ઘર સૌના માટે'નો સંકલ્‍પ સાચા અર્થમાં સાકાર કરવામાં આવી રહ્યો છે. જે હેઠળ પ્રધાનમંત્રી આવાસ યોજના(ગ્રામીણ અને શહેરી), ડો.આંબેડકર આવાસ યોજના, પંડિત દિનદયાળ આવાસ યોજના તેમજ હળપતિ આવાસ જેવી યોજનાઓ હેઠળ આ વર્ષે આશરે ૩ લાખ ૧૫ હજારથી વધુ આવાસો પૂરા પાડવાનું આયોજન છે. જેના માટે રૂ. ૪૨૭૨ કરોડની જોગવાઇ સૂચવું છું.

સમાજના પછાત અને નબળા વર્ગના તેમજ આદિજાતિ લોકોના વિકાસ માટે સરકાર હંમેશા સંવેદનશીલ છે. વિવિધ નિગમો દ્વારા છેલ્લાં ત્રણ વર્ષમાં ૧ લાખ ૩૫ હજારથી વધુ લાભાર્થીઓને ઉચ્‍ચ શિક્ષણ માટે લોન તેમજ આર્થિક સહાય આપવામાં આવી છે. નિગમોની આ કામગીરીને વેગ આપવા માટે કુલ રૂ. ૮૬૯ કરોડની જોગવાઇ કરું છું.