બેંગલુરુ | તા.૧૮: ભારતમાં યુએસ રાજદૂત સર્જિયો ગોર હાલમાં કર્ણાટકની મુલાકાતે છે, જ્યાં તેમણે બેંગલુરુની ઊર્જા અને ટેકનોલોજીના બદલાતા સ્વરૂપને નજીકથી નિહાળ્યું હતું. મંગળવારે તેમણે કર્ણાટકના મુખ્યમંત્રી સિદ્ધારમૈયા સાથે મુલાકાત કરી હતી. આ મુલાકાત દરમિયાન AI (આર્ટિફિશિયલ ઇન્ટેલિજન્સ) અને ઉભરતી ટેકનોલોજીમાં ભારત-યુએસ ભાગીદારીને કેવી રીતે મજબૂત કરી શકાય તે અંગે ગહન ચર્ચા કરવામાં આવી હતી.
ઓટો રિક્ષામાં 'રિયલ બેંગલુરુ'નો અનુભવ
મુખ્યમંત્રીને મળતા પહેલા, રાજદૂત ગોરે ભાજપના સાંસદ તેજસ્વી સૂર્યા સાથે બેંગલુરુની પ્રખ્યાત ઓટો રિક્ષામાં સવારી કરી હતી. તેમણે બેંગલુરુના સ્ટ્રીટ ફૂડ અને સ્ટાર્ટઅપ કલ્ચરના ભારોભાર વખાણ કર્યા હતા. જોકે, તેમની આ મજાની સફર વચ્ચે શહેરના નાગરિકોએ એક ગંભીર મુદ્દો ઉઠાવ્યો છે.
વિઝા સેવાઓ માટે ક્યાં સુધી જોવી પડશે રાહ?
બેંગલુરુ દેશના સોફ્ટવેર નિકાસમાં ૩૭% હિસ્સો ધરાવે છે અને અહીં ૭૦૦ થી વધુ અમેરિકન કંપનીઓ આવેલી છે. આમ છતાં, બેંગલુરુના રહેવાસીઓ અને વિદ્યાર્થીઓએ યુએસ વિઝા માટે હજુ પણ ચેન્નાઈ અથવા હૈદરાબાદના ધક્કા ખાવા પડે છે.
•    બમણી મુશ્કેલી: ઇન્ટરવ્યુ અને ફિંગરપ્રિન્ટ્સ માટે અરજદારોએ ઓછામાં ઓછી બે વાર બીજા શહેરોમાં જવું પડે છે.
•    અધૂરી સુવિધા: જોકે અમેરિકાએ ગયા વર્ષે જાન્યુઆરીમાં બેંગલુરુમાં નવું કોન્સ્યુલેટ ખોલ્યું છે, પરંતુ તેમાં ભારતીય નાગરિકો માટે સંપૂર્ણ વિઝા સેવાઓ ક્યારે શરૂ થશે તે અંગે હજુ સુધી કોઈ સ્પષ્ટતા કરવામાં આવી નથી.
સોશિયલ મીડિયા પર ઉઠી માંગ
રાજદૂત સર્જિયો ગોરે જ્યારે બેંગલુરુની મુલાકાતની પોસ્ટ શેર કરી, ત્યારે કોમેન્ટ સેક્શનમાં હજારો લોકોએ એક જ સૂર પૂરાવ્યો હતો: "અમને બેંગલુરુમાં જ વિઝા સેવાઓ આપો!" ટેક હબ ગણાતા આ શહેર અને અમેરિકાના સાન ફ્રાન્સિસ્કો જેવા શહેરો વચ્ચે સીધો સંબંધ હોવા છતાં, વિઝા પ્રક્રિયામાં પડતી અસુવિધા હવે આઈટી પ્રોફેશનલ્સ માટે માથાનો દુખાવો બની રહી છે.
મુખ્યમંત્રી સિદ્ધારમૈયાએ પણ આંતરરાષ્ટ્રીય સહયોગને મજબૂત કરવાની કટિબદ્ધતા દર્શાવી છે, ત્યારે હવે જોવાનું એ રહેશે કે યુએસ વહીવટીતંત્ર બેંગલુરુના લોકોની આ વાજબી માંગને ક્યારે સ્વીકારે છે.