રાજકોટ | તા.૧૮: જો તમે ૨૦૨૬માં કેનેડા જવાનું આયોજન કરી રહ્યા હોવ, તો તમારી તૈયારીઓ વહેલી શરૂ કરી દેવી પડશે. જૂન મહિનામાં યોજાનારા FIFA વર્લ્ડ કપ ૨૦૨૬ ની ૧૩ મેચોનું યજમાન કેનેડા બનવા જઈ રહ્યું છે, પરંતુ તેની સરકારી એજન્સી IRCC (ઇમિગ્રેશન, રેફ્યુજીસ અને સિટીઝનશિપ કેનેડા) હાલમાં ભારે દબાણ હેઠળ છે. એક તરફ સ્ટાફમાં ૨૦% નો ઘટાડો કરવામાં આવ્યો છે અને બીજી તરફ અંદાજે ૨ કરોડથી વધુ આંતરરાષ્ટ્રીય પ્રવાસીઓ ઉમટી પડવાની સંભાવના છે, જેના કારણે વિઝા પ્રક્રિયામાં લાંબુ વેઈટિંગ જોવા મળી રહ્યું છે.
કઈ શ્રેણીમાં કેટલો વિલંબ?
તાજેતરના આંકડા મુજબ, વિઝાના દરેક સેક્ટરમાં રાહ જોવાનો સમય વધ્યો છે:
•    વર્ક પરમિટ એક્સટેન્શન: આ પ્રક્રિયા હવે ૨૦૦ કેલેન્ડર દિવસથી પણ વધુ સમય લઈ રહી છે.
•    સુપર વિઝા (ભારત અને યુએસ): સુપર વિઝાની અરજીઓમાં ૧૭ થી ૧૧૦ દિવસનો તોતિંગ વધારો થયો છે.
•    ફેડરલ સ્કીલ્ડ વર્કર્સ: કુશળ કારીગરોની અરજીઓમાં સરેરાશ એક મહિનાનો વિલંબ થઈ રહ્યો છે.
•    નાગરિકતા પ્રમાણપત્ર: હવે નાગરિકતા પ્રમાણપત્ર મેળવવામાં ૧૦ મહિના જેટલો સમય લાગે છે.
વર્લ્ડ કપની માંગે ચિંતા વધારી
ડિસેમ્બરમાં વર્લ્ડ કપનું શેડ્યૂલ જાહેર થયા પછી વિઝિટર વિઝાની માંગમાં ઉછાળો આવ્યો છે. નિષ્ણાતોના મતે, આઈવરી કોસ્ટ જેવા દેશો માટે કેનેડાના વિઝિટર વિઝાનો સમય ૨૯૨ દિવસ અને સેનેગલ માટે ૨૦૩ દિવસ છે. જો ભારતીય પ્રવાસીઓ પણ છેલ્લી ઘડીએ અરજી કરશે, તો તેમને મેચો શરૂ થાય ત્યાં સુધી વિઝા મળે તેવી શક્યતા ઓછી છે.
સુરક્ષા અને છેતરપિંડીનો ભય
ભારે ભીડનો લાભ લઈને ઘણા લોકો 'નકલી ટિકિટ' બતાવીને સિસ્ટમ સાથે રમત રમવાની કોશિશ કરી શકે છે, જેના કારણે IRCC હવે સ્ક્રિનિંગ પ્રક્રિયા વધુ કડક બનાવી રહ્યું છે. આ કડકાઈને કારણે સાચા અરજદારોને પણ વધુ સમય સુધી રાહ જોવી પડી શકે છે.
કેનેડા બોર્ડર સર્વિસીસ એજન્સી (CBSA) એ જણાવ્યું છે કે તેઓ અમેરિકા અને મેક્સિકો સાથે મળીને કામ કરી રહ્યા છે જેથી પ્રવાસીઓના આ ધસારાને પહોંચી વળાય, પરંતુ હાલની સ્થિતિ જોતા પ્રોસેસિંગ ટાઈમમાં તાત્કાલિક ઘટાડો થાય તેવું લાગતું નથી.