કોલકાતા:  પશ્ચિમ બંગાળના મુખ્યમંત્રી મમતા બેનર્જીએ ભારતીય ચૂંટણી પંચની ટીકા કરવા માટે બાંગ્લાદેશની ચૂંટણીઓને "શાંતિપૂર્ણ અને આદર્શ" ગણાવી જે દાવ રમો હતો, તે હવે તેમના પર જ ઉલટો પડ્યો છે. ભારતીય ગુપ્તચર સંસ્થાઓના લેટેસ્ટ ઈન્ટેલિજન્સ રિપોર્ટમાં બાંગ્લાદેશી ચૂંટણીઓની ભયાનક વાસ્તવિકતા બહાર આવી છે. અહેવાલ મુજબ, મમતા જેને લોકશાહીનું મોડેલ ગણાવી રહ્યા હતા, ત્યાં હકીકતમાં લઘુમતી હિન્દુઓ વિરુદ્ધ એક સુનિયોજિત "હોલોકોસ્ટ" (નરસંહાર જેવી સ્થિતિ) જેવું વાતાવરણ ઉભું કરવામાં આવ્યું હતું. ગુપ્તચર સૂત્રોએ સ્પષ્ટ કર્યું છે કે પડોશી દેશમાં લોકશાહીના નામે લઘુમતી મતોને દબાવવા માટે ભયાનક ધાકધમકીનો સહારો લેવામાં આવ્યો હતો.

આશ્ચર્યજનક ડેટા સાથેના આ અહેવાલમાં જણાવાયું છે કે બાંગ્લાદેશમાં હિન્દુઓની વસ્તી અંદાજે ૮ ટકા હોવા છતાં, કુલ ૨,૦૩૪ ઉમેદવારોમાંથી માત્ર ૮૦ હિન્દુઓને જ મેદાનમાં ઉતરવાની તક મળી હતી. આ આંકડો કુલ ઉમેદવારોના માંડ ૩.૯ ટકા જેટલો થાય છે, જે દર્શાવે છે કે લઘુમતીઓને તેમની વસ્તીના પ્રમાણમાં અડધું પ્રતિનિધિત્વ પણ આપવામાં આવ્યું ન હતું. બાગેરહાટ અને ગોપાલગંજ જેવા સંવેદનશીલ વિસ્તારોમાં સુરક્ષાના બહાના હેઠળ હિન્દુ ઉમેદવારોના નામાંકન રદ કરવામાં આવ્યા હતા. ઘણા વિસ્તારોમાં ૧૫-૨૦ ટકા હિન્દુ મતદારો હોવા છતાં, મુખ્ય રાજકીય પક્ષોએ તેમને ટિકિટ ન આપીને લોકશાહીના મૂળિયાં કાપ્યા હોવાનું ગુપ્તચર એજન્સીઓનું મૂલ્યાંકન છે.

મમતા બેનર્જીના આ નિવેદન બાદ ભાજપે પણ આક્રમક વલણ અપનાવ્યું છે. ભાજપના નેતાઓએ આરોપ લગાવ્યો છે કે મુખ્યમંત્રી પોતાની વોટબેંકની રાજનીતિ માટે પડોશી દેશમાં થતા અત્યાચારોને પણ "શાંતિપૂર્ણ" ગણાવવાનું પાપ કરી રહ્યા છે. ચૂંટણી પંચે પણ આ મામલે કડક વલણ અપનાવતા પોતાની પ્રક્રિયાની પારદર્શિતાનો બચાવ કર્યો છે. ગુપ્તચર અહેવાલના અંતે ચેતવણી આપવામાં આવી છે કે બાંગ્લાદેશી ચૂંટણીઓને ભારત માટે ઉદાહરણ તરીકે રજૂ કરવી એ જમીની હકીકત અને ત્યાંના લઘુમતીઓની પીડાનું ઘોર અપમાન છે. આ ખુલાસા બાદ પશ્ચિમ બંગાળના રાજકારણમાં નવો ગરમાવો આવ્યો છે.