વિશાખાપટ્ટનમ:ભારત અને રશિયાની દોસ્તી કેટલી જૂની અને ભરોસાપાત્ર છે, તેનો પુરાવો દુનિયાએ અનેક પ્રસંગોએ જોયો છે. જ્યારે પણ ભારત પર કોઈ સંકટ આવ્યું છે, ત્યારે રશિયા હંમેશા રક્ષક બનીને ઉભું રહ્યું છે. હવે, વર્ષ ૨૦૨૬માં આ દોસ્તીનો નવો અધ્યાય લખાવા જઈ રહ્યો છે. ઇન્ટરનેશનલ ફ્લીટ રિવ્યુ (IFR 2026) માં ભાગ લેવા માટે રશિયાનું અત્યાધુનિક યુદ્ધજહાજ ભારતના દરિયાકાંઠે આવી પહોંચ્યું છે, જેનાથી વૈશ્વિક સ્તરે હલચલ મચી ગઈ છે.
ભારત અને રશિયા વચ્ચે વધતી જતી સૈન્ય નિકટતા જોઈને અમેરિકા જેવા પશ્ચિમી દેશો ચોંકી ગયા છે. અમેરિકાએ અનેકવાર ભારત પર દબાણ લાવવાનો પ્રયાસ કર્યો છે કે તે રશિયા સાથેના સંબંધો મર્યાદિત કરે, પરંતુ ભારતે હંમેશા પોતાની સ્વાયત્ત વિદેશ નીતિનો પરિચય આપ્યો છે. રશિયન યુદ્ધજહાજનું ભારતમાં આગમન એ સ્પષ્ટ સંદેશ છે કે ભારત પોતાના જૂના અને વિશ્વસનીય મિત્રને ક્યારેય નહીં છોડે.
આ વર્ષે યોજાનારા ઇન્ટરનેશનલ ફ્લીટ રિવ્યુમાં રશિયાની ભાગીદારી અત્યંત મહત્વની માનવામાં આવે છે. આ એક એવો મંચ છે જ્યાં દુનિયાભરની નૌસેનાઓ પોતાની તાકાત બતાવે છે. રશિયાએ પોતાના સૌથી શક્તિશાળી જહાજો પૈકીનું એક અહીં મોકલીને સાબિત કર્યું છે કે દક્ષિણ એશિયા અને હિંદ મહાસાગરમાં ભારત તેનો સૌથી મોટો વ્યૂહાત્મક ભાગીદાર છે.
 સોશિયલ મીડિયા પર પણ લોકો આ સમાચારને વધાવી રહ્યા છે. ઘણા યુઝર્સનું કહેવું છે કે, "રશિયા જ ભારતનો સાચો મિત્ર છે અને અમેરિકા પર ક્યારેય સંપૂર્ણ ભરોસો ન કરી શકાય." ઇતિહાસ સાક્ષી છે કે ૧૯૭૧ના યુદ્ધ વખતે પણ જ્યારે અમેરિકાએ ભારત વિરુદ્ધ સાતમું નૌકાદળ મોકલ્યું હતું, ત્યારે રશિયા (સોવિયેત સંઘ) એ જ ભારતની વહારે પોતાનું સૈન્ય મોકલ્યું હતું. આજે ફરી એ જ જૂનો ભરોસો સમુદ્રના મોજાં પર જોવા મળી રહ્યો છે