તેહરાન:વિશ્વ અત્યારે એક મોટા સૈન્ય સંઘર્ષની અણી પર ઉભું છે. અમેરિકા અને ઈરાન વચ્ચેનો તણાવ હવે ચરમસીમાએ પહોંચ્યો છે. પ્રાપ્ત અહેવાલો અનુસાર, અમેરિકા મધ્ય પૂર્વમાં અત્યાર સુધીના સૌથી મોટા લશ્કરી અભિયાનની તૈયારી કરી રહ્યું છે. જો રાજદ્વારી વાટાઘાટોમાં કોઈ ઉકેલ નહીં આવે, તો આગામી થોડા જ દિવસોમાં ઈરાન પર ભીષણ હુમલો થઈ શકે છે. ખાસ વાત એ છે કે ઈરાનમાં આવતીકાલ એટલે કે ૧૯ ફેબ્રુઆરીથી પવિત્ર રમઝાન માસ શરૂ થઈ રહ્યો છે, અને આ જ સમયગાળામાં યુદ્ધ ફાટી નીકળવાની પ્રબળ શક્યતા છે.
: તાજેતરમાં જીનીવા ખાતે ટ્રમ્પના સલાહકારો જેરેડ  કુશનર અને ઈરાની વિદેશ મંત્રી અબ્બાસ અરાઘચી વચ્ચે ત્રણ કલાક લાંબી બેઠક યોજાઈ હતી. જોકે, આ બેઠક કોઈ ખાસ પરિણામ લાવી શકી નથી. અમેરિકાના ઉપરાષ્ટ્રપતિ જે.ડી. વાન્સે સંકેત આપ્યા છે કે ઈરાન નમતું જોખવા તૈયાર નથી, અને જો રાજદ્વારી રસ્તો બંધ થશે તો લશ્કરી કાર્યવાહી એ જ અંતિમ વિકલ્પ રહેશે.
 પરમાણુ મથકો નિશાન પર: સૂત્રોના જણાવ્યા અનુસાર, આ વખતે અમેરિકા અને ઈઝરાયલ સાથે મળીને ઈરાન વિરુદ્ધ ઓપરેશન શરૂ કરશે. આ યુદ્ધ ગયા વર્ષના ૧૨ દિવસના સંઘર્ષ કરતા ઘણું મોટું અને આશરે ૬ અઠવાડિયા સુધી ચાલી શકે તેવું હશે. મુખ્ય લક્ષ્ય ઈરાનના ભૂગર્ભમાં આવેલા પરમાણુ કેન્દ્રો હોઈ શકે છે. આ કાર્યવાહીની અસર માત્ર આ બે દેશો પર જ નહીં, પરંતુ સમગ્ર મધ્ય પૂર્વના દેશો અને વૈશ્વિક અર્થતંત્ર પર પડશે.
ખાડીમાં હથિયારોનો ખડકલો: અમેરિકાએ છેલ્લા ૨૪ કલાકમાં પોતાની લશ્કરી શક્તિમાં અનેકગણો વધારો કર્યો છે:
 બે વિશાળ વિમાનવાહક જહાજો અને એક ડઝન યુદ્ધ જહાજો તૈનાત.
ફાઇટર જેટ્સ: તાજેતરમાં ૫૦ નવા F-35, F-22 અને F-16 જેટ્સ ખાડીમાં પહોંચ્યા છે.
હવાઈ સુરક્ષા: અસંખ્ય એર ડિફેન્સ સિસ્ટમ્સ અને ૧૫૦થી વધુ કાર્ગો વિમાનો દ્વારા શસ્ત્રોનો પુરવઠો મોકલાયો છે.
જો આગામી બે અઠવાડિયામાં કોઈ નક્કર સમજૂતી નહીં થાય, તો પરિસ્થિતિ કાબૂ બહાર જઈ શકે છે. ઈઝરાયલે પણ પોતાની સેનાને હાઈ એલર્ટ પર રાખી છે. હવે આખી દુનિયાની નજર તેહરાન અને વોશિંગ્ટન પર છે.