હૈદરાબાદ: દક્ષિણ ભારતના તેલંગાણા રાજ્યમાં હવામાન વિભાગે વર્ષના પ્રથમ કમોસમી વરસાદને લઈને જોખમની ઘંટડી વગાડી દીધી છે. ૨૨ થી ૨૪ ફેબ્રુઆરી દરમિયાન રાજ્યના મોટાભાગના વિસ્તારોમાં વાતાવરણમાં મોટો પલટો આવવાની શક્યતા છે. આ દરમિયાન માત્ર હળવો વરસાદ જ નહીં, પણ તેજ પવન અને કેટલાક સ્થળોએ કરા (Hailstorms) પડવાની પણ આગાહી કરવામાં આવી છે, જેના કારણે જનજીવન અને ખેતી પર માઠી અસર પડી શકે છે.
હવામાન વિભાગના જણાવ્યા અનુસાર, વરસાદની શરૂઆત ૨૨ ફેબ્રુઆરીએ ઉત્તર અને પૂર્વ તેલંગાણાથી થશે. આદિલાબાદ, જગિત્યાલ, મંચેરિયાલ અને મુલુગુ જેવા જિલ્લાઓમાં વાવાઝોડાની અસર જોવા મળશે. ત્યારબાદ ૨૩ અને ૨૪ ફેબ્રુઆરીએ હૈદરાબાદ, વારંગલ, સિદ્દીપેટ, કરીમનગર અને ખમ્મમ જેવા મુખ્ય શહેરોમાં પણ મેઘરાજા ધમાકેદાર બેટિંગ કરી શકે છે.
 આ કમોસમી વરસાદ ખેડૂતો માટે મુસીબત બનીને આવી શકે છે. ખેતરમાં તૈયાર થયેલા પાકને કરા અને વરસાદથી બચાવવા માટે કૃષિ વિભાગે અત્યંત સાવધાની રાખવાની સલાહ આપી છે. ખાસ કરીને જે વિસ્તારોમાં ૨૦ થી ૪૦ મીમી જેટલો વરસાદ ખાબકવાની શક્યતા છે, ત્યાં પાકને સુરક્ષિત સ્થાને ખસેડવા માટે સૂચના આપવામાં આવી છે.
હાલની પરિસ્થિતિ મુજબ વાદળો ઘેરાઈ રહ્યા છે અને ભેજનું પ્રમાણ વધી રહ્યું છે. જો પવનની દિશા કે દબાણમાં કોઈ ફેરફાર થશે, તો હવામાન વિભાગ દ્વારા ૨૦ ફેબ્રુઆરીએ વધુ એક સ્પષ્ટ બુલેટિન જારી કરવામાં આવશે. નાગરિકોને આ સમયગાળા દરમિયાન વીજળીના થાંભલા અને ઝાડ નીચે ઊભા ન રહેવા તથા ઘરની બહાર નીકળતા પહેલા હવામાનની તપાસ કરવાની સલાહ આપવામાં આવી છે.