મુંબઈ:   બોલિવૂડમાં ફરી એકવાર સત્ય ઘટના પર આધારિત હાઈ-વોલ્ટેજ દેશભક્તિ ફિલ્મની તૈયારીઓ તેજ થઈ ગઈ છે. 'ધ કાશ્મીર ફાઇલ્સ' જેવી સુપરહિટ ફિલ્મ આપનાર ડિરેક્ટર વિવેક અગ્નિહોત્રી હવે 'ઓપરેશન સિંદૂર'ની સાહસિક કથાને મોટા પડદા પર ઉતારવા સજ્જ થયા છે. અહેવાલો અનુસાર, વિવેક અગ્નિહોત્રીએ આ ભવ્ય પ્રોજેક્ટ માટે ટી-સીરીઝના માલિક ભૂષણ કુમાર સાથે હાથ મિલાવ્યા છે. ગયા વર્ષે ભારત અને પાકિસ્તાન વચ્ચે ખેલાયેલા ટૂંકા પણ ભીષણ જંગમાં ભારતીય સૈનિકોએ જે રીતે પાકિસ્તાની આતંકવાદીઓના ચીથરેચીથરા ઉડાવ્યા હતા, તે વીરતાને આ ફિલ્મમાં આબેહૂબ રીતે દર્શાવવામાં આવશે.

૭ મે, ૨૦૨૫નો એ દિવસ ભારતીય સેનાના ઇતિહાસમાં સુવર્ણ અક્ષરે લખાયેલો છે, જ્યારે કાશ્મીરના પહેલગામમાં પ્રવાસીઓ પર થયેલા કાયરતાપૂર્ણ હુમલાનો બદલો લેવા માટે 'ઓપરેશન સિંદૂર' શરૂ કરવામાં આવ્યું હતું. ભારતીય વાયુસેના અને પાયદળના સૈનિકોએ મિસાઈલોના મારાથી સરહદ પાર રહેલા ડઝનબંધ આતંકવાદી લોન્ચિંગ પેડ્સને પળવારમાં રાખ કરી દીધા હતા. આ ઓપરેશને પાકિસ્તાનને એવો સબક શીખવ્યો હતો કે જેને તેઓ ક્યારેય ભૂલી શકશે નહીં. ફિલ્મના માધ્યમથી વિવેક અગ્નિહોત્રી એ રહસ્યમય રણનીતિ અને સૈનિકોના બલિદાનને જનતા સુધી પહોંચાડવા માંગે છે, જે અત્યાર સુધી ફાઈલોમાં કેદ હતી.

જોકે, આ ફિલ્મની સ્ટારકાસ્ટ અને શૂટિંગના શેડ્યૂલ અંગે હજુ સુધી કોઈ સત્તાવાર જાહેરાત કરવામાં આવી નથી, પરંતુ પિંકવિલાના રિપોર્ટ મુજબ પ્રોજેક્ટનું કામ પૂરજોશમાં ચાલી રહ્યું છે. વિવેક અગ્નિહોત્રીની પાછલી ફિલ્મ 'ધ બંગાળ ફાઇલ્સ' બોક્સ ઓફિસ પર ખાસ સફળ રહી નહોતી, તેથી તેમના માટે 'ઓપરેશન સિંદૂર' ફરી એકવાર પોતાની પકડ જમાવવાની મોટી તક છે. ચાહકોમાં અત્યારથી જ ઉત્તેજના છે કે આ ફિલ્મ ૨૦૨૬ના અંતમાં રિલીઝ થશે કે આવતા વર્ષે. શું આ ફિલ્મ ઉરી અને કાશ્મીર ફાઇલ્સની જેમ બોક્સ ઓફિસના તમામ રેકોર્ડ તોડશે? તે જોવું રસપ્રદ રહેશે.