નવી દિલ્‍હી,તા.૧૯: સુપ્રીમ કોર્ટે જણાવ્‍યું હતું કે ભાઈ-ભત્રીજા-સગાવાદ અને સ્‍વાર્થ લોકશાહી વ્‍યવસ્‍થા માટે ગંભીર ગુના છે, ખાસ કરીને જ્‍યારે સરકારી સેવાના સભ્‍યો દ્વારા કરવામાં આવે છે. હરિયાણા સરકારી હાઉસિગ સોસાયટીના ગવર્નિગ બોડી દ્વારા તેના સભ્‍યો અને કર્મચારીઓને આપવામાં આવેલા ફલેટની ફાળવણી રદ કરતી વખતે સર્વોચ્‍ચ અદાલતે આ અવલોકન કર્યું હતું.

જસ્‍ટીસ સંજય કુમાર અને કે. વિનોદ ચંદ્રનની બેન્‍ચે તેના ચુકાદામાં જણાવ્‍યું હતું કે ગવર્નિગ બોડીના સભ્‍યોએ પોતાના અને પોતાના કર્મચારીઓના ફાયદા માટે તેમના હોદ્દાનો દુરુપયોગ કર્યો હતો. બેન્‍ચે પંજાબ અને હરિયાણા હાઇકોર્ટના આદેશને રદ કરતી વખતે આ ચુકાદો આપ્‍યો હતો. હાઈકોર્ટે ફાળવણી પ્રક્રિયામાં દખલ કરવાનો ઇનકાર કર્યો હતો. બેન્‍ચે પોતાના નિર્ણયમાં ફલેટ ફાળવવામાં ગવર્નિગ બોડીના અધિકારીઓ દ્વારા હોદ્દાના દુરુપયોગ પર ચિંતા વ્‍યક્‍ત કરી હતી. બેન્‍ચે વધુમાં જણાવ્‍યું હતું કે ભત્રીજાવાદ અને સ્‍વાર્થ લોકશાહી વ્‍યવસ્‍થા માટે અભિશાપ છે, ખાસ કરીને જ્‍યારે તે સરકારી સેવા ધરાવતા સમાજમાં થાય છે.

સુપ્રીમ કોર્ટે પોતાના નિર્ણયમાં જણાવ્‍યું હતું કે અપીલકર્તાઅએ જાહેરાત મુજબ ફલેટ માટે અરજી કરી હતી અને ડેપ્‍યુટેશન સમયગાળા અને મૂળ પગાર સંબંધિત શરતો પૂર્ણ કરીને તમામ બાબતોમાં લાયક હતા. સુપ્રીમ કોર્ટે HUDA પર ૧ લાખ રૂપિયાનો દંડ ફટકાર્યો હતો, જ્‍યારે બીબી ગુપ્તાને ૫૦,૦૦૦ રૂપિયા અને પૂરણ ચંદને ૨૫,૦૦૦ રૂપિયાનો દંડ ફટકાર્યો હતો. બેન્‍ચે HUDAને અપીલકર્તાને મુકદ્દમા ખર્ચ તરીકે ૫૦,૦૦૦ રૂપિયા ચૂકવવાનો પણ આદેશ આપ્‍યો હતો.

દંડની બાકીની રકમ સુપ્રીમ કોર્ટના કાનૂની સેવા સત્તામંડળમાં જમા કરાવવાની રહેશે.  બેન્‍ચે બંને ફાળવણીકારોને ફલેટ ફાળવણી માટે જમા કરાયેલા પૈસા એક મહિનાની અંદર પરત કરવાનો આદેશ આપ્‍યો હતો. તેણે ફાળવણીકારોને તેમના પૈસા મળ્‍યાના એક મહિનાની અંદર ફલેટ ખાલી કરવાનો પણ આદેશ આપ્‍યો હતો.

સુપ્રીમ કોર્ટે હરિયાણા અર્બન ડેવલપમેન્‍ટ ઓથોરિટી (HUDA), અર્બન એસ્‍ટેટ અને ટાઉન એન્‍ડ કન્‍ટ્રી પ્‍લાનિંગ એમ્‍પ્‍લોયીઝ વેલ્‍ફેર ઓર્ગેનાઇઝેશન (HEWO) ના સભ્‍ય દિનેશ કુમારની અપીલ પર સુનાવણી કરી. તેમણે બે હાઇ-એન્‍ડ સુપર ડિલક્‍સ ફલેટની ફાળવણીને પડકારી હતી. કુમારે પોતાની અપીલમાં ફલેટની ફાળવણીમાં પક્ષપાતનો આરોપ લગાવ્‍યો હતો.