નવી દિલ્હી, તા. ૧૯: ભારતીય વિદ્યાર્થીઓ કે જેઓ વિદેશમાં ઉચ્ચ શિક્ષણ મેળવવાનું સપનું જોઈ રહ્યા છે, તેમના માટે ફ્રાન્સ તરફથી ખૂબ જ ખુશીના સમાચાર આવ્યા છે. ફ્રાન્સના રાષ્ટ્રપતિ ઇમેન્યુઅલ મેક્રોને બુધવારે નવી દિલ્હીમાં જાહેરાત કરી હતી કે ફ્રાન્સ ભારતીય વિદ્યાર્થીઓ માટે વિઝા પ્રક્રિયા અને એડમિશન (સોર્સિંગ) ની પ્રક્રિયાને અત્યંત સરળ અને સુવ્યવસ્થિત બનાવશે. આ પગલાનો મુખ્ય હેતુ ભારત અને ફ્રાન્સ વચ્ચેના શૈક્ષણિક સંબંધોને નવા શિખરે પહોંચાડવાનો છે.
2030 સુધીનો મોટો પ્લાન
નવી દિલ્હીમાં AIIMS કેમ્પસ ખાતે સંબોધન કરતા રાષ્ટ્રપતિ મેક્રોને જણાવ્યું કે, "વડાપ્રધાન નરેન્દ્ર મોદી અને મેં નક્કી કર્યું છે કે વર્ષ 2030 સુધીમાં દર વર્ષે 30,000 ભારતીય વિદ્યાર્થીઓને ફ્રાન્સમાં આવકારવામાં આવે. હાલમાં આ સંખ્યા લગભગ 10,000 છે, જેને ત્રણ ગણી વધારવાનો અમારો નિર્ધાર છે." તેમણે ભારપૂર્વક કહ્યું કે વિદ્યાર્થીઓની અપેક્ષાઓ મુજબ પ્રક્રિયાઓને વધુ વ્યવહારુ બનાવવામાં આવશે.
હવે ભાષાનો અવરોધ થશે દૂર
ઘણા વિદ્યાર્થીઓ ફ્રેન્ચ ભાષા ન આવડતી હોવાને કારણે ફ્રાન્સ જવાનું ટાળતા હતા, પરંતુ હવે મેક્રોને ખાતરી આપી છે કે ફ્રાન્સમાં હવે વધુને વધુ અભ્યાસક્રમો અંગ્રેજી ભાષામાં શીખવવામાં આવશે. આનાથી ભારતીય વિદ્યાર્થીઓને વિશ્વસ્તરીય શિક્ષણ, અત્યાધુનિક સંશોધન કેન્દ્રો અને આંતરશાખાકીય સહયોગની સરળતાથી ઍક્સેસ મળશે.
સ્વાસ્થ્ય ક્ષેત્રે AI નો નવો યુગ
આ મુલાકાત દરમિયાન રાષ્ટ્રપતિ મેક્રોન અને કેન્દ્રીય આરોગ્ય પ્રધાન જેપી નડ્ડાએ સંયુક્ત રીતે એઈમ્સ ખાતે 'ગ્લોબલ હેલ્થમાં એઆઈ (AI) પર ઈન્ડો-ફ્રેન્ચ કેમ્પસ'નું ઉદ્ઘાટન કર્યું હતું. આ કેમ્પસ આર્ટિફિશિયલ ઇન્ટેલિજન્સ દ્વારા આરોગ્યસંભાળના ઉકેલો શોધવા, નવીન સંશોધનો કરવા અને બંને દેશોના નિષ્ણાતો વચ્ચે જ્ઞાનના આદાનપ્રદાન માટે એક મહત્વનું કેન્દ્ર બનશે.
વિદ્યાર્થીઓ માટે આકર્ષક કેન્દ્ર
ફ્રાન્સ હવે યુરોપમાં શિક્ષણ માટેનું એક મોટું હબ બની રહ્યું છે. મેક્રોને ભારતીય વિદ્યાર્થીઓને આમંત્રણ આપતા કહ્યું કે, "અમારી પાસે શ્રેષ્ઠ શિક્ષણ પ્રણાલી છે અને અમે તમને ટેકો આપવા માટે વધુ સારા જોડાણો સ્થાપિત કરીશું." વિઝા પ્રક્રિયામાં સરળતા અને અંગ્રેજીમાં શિક્ષણ મળવાની જાહેરાત બાદ હવે કેનેડા, યુએસ અને યુકેની જેમ ફ્રાન્સ પણ ભારતીય વિદ્યાર્થીઓની પહેલી પસંદ બની શકે છે.