બેંગલુરુ: ભારત ભલે કૃષિપ્રધાન દેશ હોય, પરંતુ આજે ખેડૂતો માટે એક નવી જ સામાજિક સમસ્યા ઊભી થઈ છે. કર્ણાટકના ટુમકુર જિલ્લાના કુનિગલ મતવિસ્તારના ધારાસભ્ય રંગનાથને મુખ્યમંત્રી સિદ્ધારમૈયાને એક ભાવુક અને ચોંકાવનારો પત્ર લખ્યો છે. પત્રમાં તેમણે જણાવ્યું છે કે, ગ્રામીણ વિસ્તારોમાં ખેતી પર નિર્ભર યુવાનોને આજે લગ્ન માટે કન્યાઓ મળી રહી નથી, જે ખૂબ જ ગંભીર બાબત છે.
૩૦ વર્ષ વટાવ્યા છતાં હજારો યુવાનો કુંવારા
ધારાસભ્યએ પત્રમાં ઉલ્લેખ કર્યો છે કે, ઘણી યુવતીઓ અને તેમના પરિવારો ખેડૂત પુરુષ સાથે લગ્ન કરવા તૈયાર હોતા નથી. તેમને લાગે છે કે ખેતીમાં આર્થિક સુરક્ષા અને સામાજિક આકર્ષણ ઓછું છે. પરિણામે, કુનિગલ તાલુકા અને અન્ય ગ્રામીણ વિસ્તારોમાં હજારો ખેડૂત યુવાનો ૩૦ વર્ષની ઉંમર વટાવી ગયા હોવા છતાં અપરિણીત છે. આ સામાજિક અસંતુલનને રોકવા માટે ધારાસભ્યએ સરકાર પાસે સહાયની માંગ કરી છે.
શું છે ધારાસભ્યની અનોખી માંગ?
રંગનાથને મુખ્યમંત્રીને વિનંતી કરી છે કે આગામી વિધાનસભા સત્રમાં એક એવી યોજનાની જાહેરાત કરવામાં આવે, જેમાં:
•    ખેતી પર નિર્ભર પુરુષો સાથે લગ્ન કરનારી મહિલાઓને 'ખાસ દરજ્જો' આપવામાં આવે.
•    આવી મહિલાઓને સરકાર તરફથી 'ખાસ લગ્ન ભથ્થું' અથવા આર્થિક પ્રોત્સાહન આપવામાં આવે.
•    ખેડૂત પરિવારોની સામાજિક અને આર્થિક સુરક્ષા વધારવા માટે સરકારી પગલાં લેવામાં આવે.
ખેડૂત સંગઠનોની પણ સમાન વ્યથા
માત્ર ધારાસભ્ય જ નહીં, પરંતુ મંડ્યા અને તુમકુરુ જેવા જિલ્લાઓના ખેડૂત સંગઠનોએ પણ અગાઉ આવી ફરિયાદો કરી છે. કેટલાક જૂથોએ તો ખેડૂતોના સંતાનો માટે સરકારી નોકરીઓમાં અનામતની માંગ પણ કરી છે, જેથી તેમની સામાજિક પ્રતિષ્ઠામાં વધારો થાય અને તેમને લગ્ન માટે મુશ્કેલી ન પડે.
ખેતી છોડીને શહેરો તરફ ભાગતી પેઢી વચ્ચે ખેડૂતોની આ વ્યથા આજે એક મોટો ચર્ચાનો વિષય બની છે. જો સરકાર આ દિશામાં કોઈ નક્કર કદમ ઉઠાવશે, તો કદાચ ખેતરોમાં ફરીથી ખુશીઓની શરણાઈઓ ગુંજતી થશે.