કોટા: દેશના રાજકારણમાં આજે ત્યારે ખળભળાટ મચી ગયો જ્યારે કોંગ્રેસના દિગ્ગજ નેતા રાહુલ ગાંધી અને અન્ય ૨૫ સાંસદોને જાનથી મારી નાખવાની ખુલ્લેઆમ ધમકી આપવામાં આવી. રાજસ્થાનના કોટામાં એક વ્યક્તિએ સોશિયલ મીડિયા પર વીડિયો અપલોડ કરી લોકસભાના સભ્યોને ગોળી મારવાની વાત કરી હતી. ઘટનાની ગંભીરતાને જોતા રાજસ્થાન પોલીસે તાત્કાલિક એક્શન લઈ આરોપી રાજ સિંહની અટકાયત કરી છે.
શું હતી સમગ્ર ધમકી?
પોતાને કરણી સેનાનો પ્રવક્તા ગણાવતા રાજ સિંહ નામના આ વ્યક્તિએ વીડિયોમાં અત્યંત વાંધાજનક ભાષાનો પ્રયોગ કર્યો હતો. તેણે આરોપ લગાવ્યો હતો કે બજેટ સત્ર દરમિયાન કોંગ્રેસના ૨૫ સાંસદોએ લોકસભા અધ્યક્ષ ઓમ બિરલાનું અપમાન કર્યું છે. તેણે સીધી ચેતવણી આપતા કહ્યું, "રાહુલ ગાંધી સાંભળી લે, જો આવી ઘટના ફરી બની તો અમે તમારા ઘરમાં ઘૂસીને તમને ગોળી મારી દઈશું." એટલું જ નહીં, તેણે ૨૪ કલાકમાં સાંસદોની ધરપકડ ન થાય તો એક પછી એકની હત્યા કરવાની પણ ચીમકી આપી હતી.
પોલીસની કડક કાર્યવાહી
આ વીડિયો સોશિયલ મીડિયા પર આગની જેમ ફેલાઈ જતાં કોટા પોલીસ એક્શનમાં આવી હતી. કોટાના પોલીસ અધિક્ષક (SP) તેજસ્વની ગૌતમે જણાવ્યું કે, બોરખેડા પોલીસ સ્ટેશન દ્વારા આરોપીની અટકાયત કરવામાં આવી છે અને તેની સઘન પૂછપરછ ચાલી રહી છે. જે સ્થળે વીડિયો શૂટ કરવામાં આવ્યો હતો ત્યાં પીએમ મોદી અને ઓમ બિરલાની તસવીરો પણ જોવા મળી હતી, જેના આધારે તપાસ તેજ કરવામાં આવી છે.
ભાજપ અને કરણી સેનાએ પલ્લું ઝાટક્યું
આ મામલે રાજકીય ગરમાવો વધતા ભાજપ અને કરણી સેના બંનેએ સ્પષ્ટતા કરી છે. કોટા ભાજપ શહેર પ્રમુખ રાકેશ જૈને જણાવ્યું કે આ વ્યક્તિનો પાર્ટી સાથે કોઈ લેવાદેવા નથી. બીજી તરફ, કરણી સેનાએ પણ રાજ સિંહ સાથેના સંબંધોનો ઈનકાર કર્યો છે. તપાસમાં એ બહાર આવ્યું છે કે આરોપીએ વ્યક્તિગત આક્રોશમાં અથવા સસ્તી લોકપ્રિયતા મેળવવા માટે આ પગલું ભર્યું હોઈ શકે છે.
સુરક્ષામાં વધારો
વિપક્ષી નેતા રાહુલ ગાંધીને મળેલી આ ધમકી બાદ દિલ્હીમાં પણ સુરક્ષા એજન્સીઓ સાબદી બની છે. કોંગ્રેસ પક્ષે આ ઘટનાની આકરી નિંદા કરી છે અને આરોપી સામે કડકમાં કડક કાયદાકીય કાર્યવાહી કરવાની માંગ કરી છે.
કોટામાં હાલમાં તણાવભરી શાંતિ છે અને પોલીસ આરોપીના ભૂતકાળ અને કોઈ અન્ય મોટા કાવતરાની શક્યતાઓની તપાસ કરી રહી છે.