લખનૌ:ઉત્તર પ્રદેશમાં ૨૦૨૭ની વિધાનસભા ચૂંટણીના આડે હજુ સમય છે, પરંતુ સત્તાધારી ભાજપ અને તેના માતૃ સંગઠન રાષ્ટ્રીય સ્વયંસેવક સંઘ (RSS) એ અત્યારથી જ વ્યૂહરચનાના પાસા ફેંકવાનું શરૂ કરી દીધું છે. સંઘ પ્રમુખ મોહન ભાગવત હાલમાં ઉત્તર પ્રદેશના પ્રવાસે છે, જ્યાં તેમણે લખનૌમાં મુખ્યમંત્રી યોગી આદિત્યનાથ અને બંને નાયબ મુખ્યમંત્રીઓ સાથે મહત્વપૂર્ણ બેઠકો યોજીને રાજકીય ગરમાવો વધારી દીધો છે.
સૂત્રોના જણાવ્યા અનુસાર, મોહન ભાગવતે નિરાલા નગરના સરસ્વતી શિશુ મંદિરમાં મુખ્યમંત્રી યોગી સાથે અંદાજે ૩૦ થી ૪૦ મિનિટ સુધી એકાંતમાં ચર્ચા કરી હતી. આ બેઠકનો મુખ્ય હેતુ વિપક્ષ દ્વારા ઉભા કરાયેલા જ્ઞાતિ આધારિત રાજકારણ અને PDA (પછાત, દલિત, અલ્પસંખ્યક) ના સમીકરણોને તોડવાનો છે. સંઘ માને છે કે જો હિન્દુ મતો જ્ઞાતિઓમાં વહેંચાઈ જશે તો ભાજપને નુકસાન થઈ શકે છે. તેથી, ૨૦૨૭ પહેલા તમામ હિન્દુઓને એક મંચ પર લાવવા માટે 'સામાજિક સમરસતા' અભિયાન તેજ કરવા સૂચના અપાઈ છે.
 મુખ્યમંત્રી બાદ ગુરુવારે સવારે મોહન ભાગવતે બંને નાયબ મુખ્યમંત્રીઓ કેશવ પ્રસાદ મૌર્ય અને બ્રજેશ પાઠક સાથે પણ અલગ-અલગ મુલાકાત કરી હતી. સરસ્વતી કુંજ ખાતે યોજાયેલી આ બેઠકોમાં સરકાર અને સંગઠન વચ્ચેના સંકલન પર ભાર મૂકવામાં આવ્યો હતો. ખાસ કરીને દલિત અને ઓબીસી મતોને ભાજપ સાથે જોડી રાખવા માટે સરકારની યોજનાઓ છેવાડાના માનવી સુધી કેવી રીતે પહોંચાડવી, તે અંગે માર્ગદર્શન આપવામાં આવ્યું હતું.
આ બેઠકો પરથી સ્પષ્ટ થાય છે કે સંઘે આગામી ચૂંટણી માટે ત્રણ સ્તરીય રણનીતિ બનાવી છે:
૧. હિન્દુત્વનો મજબૂત એજન્ડા: સાંસ્કૃતિક અને ધાર્મિક મુદ્દાઓને ફરીથી જીવંત કરવા.
૨. જ્ઞાતિવાદ વિરુદ્ધ એકતા: જ્ઞાતિના રાજકારણને હટાવીને એકીકૃત હિન્દુ ઓળખ પ્રસ્થાપિત કરવી.
૩. સરકાર-સંગઠન સંકલન: શતાબ્દી વર્ષ નિમિત્તે સંઘના કાર્યકરોને સીધા જનતા સાથે જોડવા.
તાજેતરમાં યુજીસી બિલ અને ધાર્મિક મુદ્દાઓ પર જે વિવાદો સર્જાયા છે, તેને જોતા ભાજપ અને સંઘ ૨૦૨૭માં કોઈપણ પ્રકારનું જોખમ લેવા માંગતા નથી. મોહન ભાગવતની આ મુલાકાત ભાજપના કાર્યકરોમાં નવો ઉત્સાહ ભરવાની સાથે વિપક્ષી છાવણીમાં પણ ચિંતા જન્માવી રહી છે.