નવી દિલ્‍હી, તા.૨૦: ભારતીય રેલવે દ્વારા એક મહત્‍વનો નિર્ણય લેવામાં આવ્‍યો છે, જેમાં ૧૦ જેટલી ટ્રેનોનો સુપર ફાસ્‍ટ દરજ્જો છીનવી લેવામાં આવ્‍યો છે. આ ટ્રેનો હવે સામાન્‍ય મેલ અથવા એક્‍સપ્રેસ ટ્રેન તરીકે દોડશે. આ ફેરફારને કારણે મુસાફરોને સીધો આર્થિક ફાયદો થશે, કારણ કે સુપર ફાસ્‍ટ ટ્રેનો પર લાગતો વધારાનો ચાર્જ હવે ભાડામાંથી બાદ કરવામાં આવશે. રેલવે વિભાગના જણાવ્‍યા અનુસાર, આ ટ્રેનોની સરેરાશ ઝડપ નિર્ધારિત માપદંડો મુજબ ન હોવાને કારણે આ નિર્ણય લેવાયો છે. લાંબા સમયથી મુસાફરો દ્વારા આ અંગે રજૂઆતો કરવામાં આવી રહી હતી, જેના પગલે રેલવેએ ભાડા ઘટાડીને સામાન્‍ય જનતાને મોટી રાહત આપી છે.