તાઈપેઈ: પ્રેમ આંધળો હોય છે એવું તો આપણે સાંભળ્યું છે, પણ જ્યારે પ્રેમમાં ૧૬૨ કરોડથી વધુની મિલકત ભળે ત્યારે તે કેવો 'યુદ્ધ' જેવો માહોલ સર્જે છે તેનો જીવંત પુરાવો તાઈવાનના તાઈપેઈમાં જોવા મળ્યો છે. અહીંના એક ૧૦૨ વર્ષીય કરોડપતિ ઉદ્યોગપતિ શ્રી વાંગે જ્યારે તેમની ૬૮ વર્ષીય કેરટેકર સાથે ગુપ્ત લગ્ન કર્યા, ત્યારે તેમના પરિવારે ધોળા દિવસે હોસ્પિટલની બહારથી જ તેમનું ફિલ્મી ઢબે 'અપહરણ' કરી લીધું હતું.
હોસ્પિટલની બહાર જામી 'ગડદાપાટુ'
ઘટના ૩ ફેબ્રુઆરીની છે, જ્યારે શતાબ્દી વટાવી ચૂકેલા વાંગ તેમની નવી પત્ની શ્રીમતી લાઈ સાથે મેડિકલ ચેકઅપ માટે હોસ્પિટલ આવ્યા હતા. જેવા તેઓ બહાર નીકળ્યા, ત્યાં અગાઉથી જ ઘાત લગાવીને બેઠેલા તેમના ત્રણ પુત્રો, પુત્રવધૂઓ અને પૌત્રોના ટોળાએ હુમલો કર્યો હતો. સંબંધીઓએ નવી પત્નીને ધક્કો મારી નીચે પાડી દીધી અને વૃદ્ધ વાંગની વ્હીલચેર ખેંચીને તેમને પરાણે ગાડીમાં બેસાડી લઈ ગયા હતા. આ અસ્તવ્યસ્ત દ્રશ્યોના વિડિયો સોશિયલ મીડિયા પર વાયરલ થયા છે.
કરોડોનું આંધણ અને લગ્નનો વિવાદ
વિવાદનું અસલી કારણ વાંગની અઢળક સંપત્તિ છે.
•    ગુપ્ત લગ્ન: વાંગે ૫ જાન્યુઆરીએ પરિવારને જાણ કર્યા વગર ૬૮ વર્ષની કેરટેકર સાથે લગ્ન કરી લીધા હતા.
•    મિલકતની વહેંચણી: લગ્ન બાદ તુરંત જ દાદાએ અંદાજે £૪.૭ મિલિયન (આશરે ૪૭ કરોડ રૂપિયા) ની કિંમતના ૭ પ્લોટ અને વીમા પોલિસી નવી પત્નીના નામે કરી દીધી હતી.
•    કુલ નસીબ: તેમની કુલ સંપત્તિ ૧૬ થી ૧૮.૭ મિલિયન પાઉન્ડ (આશરે ૧૬૨ થી ૧૮૯ કરોડ રૂપિયા) હોવાનો અંદાજ છે.
પરિવારના આક્ષેપો વિરુદ્ધ પત્નીનો બચાવ
વાંગના સંતાનોનો આરોપ છે કે કેરટેકર લાઈએ તેમના પિતાને બહારની દુનિયાથી અલગ કરી દીધા હતા અને તેમની બગડતી માનસિક સ્થિતિનો ફાયદો ઉઠાવીને સંપત્તિ હડપવાનો પ્લાન ઘડ્યો છે. બીજી તરફ, શ્રીમતી લાઈએ પોલીસમાં ફરિયાદ નોંધાવી છે કે તેની સાથે મારપીટ કરવામાં આવી છે અને તેણે રક્ષણની માંગ કરી છે.
તંત્રના જણાવ્યા અનુસાર, લગ્ન સમયે વાંગ પ્રશ્નોના જવાબ આપવા સક્ષમ હતા, તેથી કાયદેસર રીતે લગ્ન માન્ય છે. હવે આ ૧૦૨ વર્ષના ઉદ્યોગપતિના નસીબનો ફેંસલો કોર્ટના રૂમમાં થશે.