નવી દિલ્હી: ભારતના સૌથી ધનાઢ્ય ઉદ્યોગપતિ અને રિલાયન્સ ઇન્ડસ્ટ્રીઝના ચેરમેન મુકેશ અંબાણીએ આર્ટિફિશિયલ ઇન્ટેલિજન્સ (AI) ના ભવિષ્ય અંગે મોટું વિઝન રજૂ કર્યું છે. 'AI ઇમ્પેક્ટ સમિટ 2026' માં સંબોધન કરતા તેમણે સ્પષ્ટ કર્યું હતું કે ભારત માત્ર AI નો વપરાશકર્તા નહીં, પણ એક મહાસત્તા તરીકે ઉભરી આવશે. તેમણે આ ક્ષેત્રમાં આગામી સાત વર્ષમાં ₹10 લાખ કરોડના રોકાણની જાહેરાત કરીને સમગ્ર વિશ્વનું ધ્યાન ખેંચ્યું છે.
AI શક્તિ કે લોકશાહી? અંબાણીનો તર્ક
મુકેશ અંબાણીએ AI ના બે પાસાઓ રજૂ કર્યા હતા:
1.    એકાધિકાર વિરુદ્ધ લોકશાહી: તેમણે જણાવ્યું કે એક તરફ એવો રસ્તો છે જ્યાં AI મોંઘું છે અને તેની શક્તિ માત્ર ગણ્યાગાંઠ્યા દેશો પાસે છે. પરંતુ ભારત બીજા રસ્તામાં માને છે, જ્યાં AI દરેક માટે ઉપલબ્ધ, સસ્તું અને ફાયદાકારક હોય.
2.    ભારતની તાકાત: અંબાણીએ વિશ્વાસ વ્યક્ત કર્યો કે ભારતની વસ્તી, ડિજિટલ ઈન્ફ્રાસ્ટ્રક્ચર અને સસ્તા ડેટાના કારણે ભારત ૨૧મી સદીમાં AI પાવર હાઉસ બનશે.
જિયો ઇન્ટેલિજન્સ અને ઐતિહાસિક રોકાણ
અંબાણીએ ભારપૂર્વક કહ્યું કે, "ભારતને ઇન્ટેલિજન્સ (બુદ્ધિ) ભાડે લેવાનું પરવડી શકે તેમ નથી."
•    ₹10 લાખ કરોડનું રોકાણ: રિલાયન્સ અને જિયો મળીને ચાલુ વર્ષથી શરૂ કરીને આગામી સાત વર્ષમાં ₹10 લાખ કરોડનું રોકાણ કરશે. આ રોકાણ દેશના આર્થિક મૂલ્ય અને વ્યૂહાત્મક મજબૂતી માટે હશે.
•    ડેટા સેન્ટર્સ: જામનગરમાં 'મલ્ટી-ગીગા વોટ ડેટા રેડી સેન્ટર્સ' નું નિર્માણ શરૂ થઈ ચૂક્યું છે. જેમાંથી ૧૨૦ મેગાવોટની ક્ષમતા ૨૦૨૬ના બીજા ભાગ સુધીમાં કાર્યરત થઈ જશે.
સામાન્ય માણસને શું ફાયદો?
જેવી રીતે જિયોએ ડેટાના ભાવ ઘટાડીને ક્રાંતિ કરી હતી, તે જ રીતે મુકેશ અંબાણી AI ના ખર્ચમાં પણ તોતિંગ ઘટાડો કરવા માંગે છે.
•    દરેક સેક્ટરમાં AI: જિયો દ્વારા દેશના દરેક નાગરિક, અર્થતંત્રના દરેક ક્ષેત્ર અને સરકારી સેવાઓ સુધી AI પહોંચાડવામાં આવશે.
•    સોવરિન કમ્પ્યુટ: ભારત પાસે પોતાનું કમ્પ્યુટિંગ માળખું હશે, જેથી ડેટા અને ટેકનોલોજી માટે પશ્ચિમી દેશો પર નિર્ભર રહેવું ન પડે.
મુકેશ અંબાણીના આ વિઝનથી સ્પષ્ટ છે કે આગામી દાયકામાં ભારત માત્ર 'માહિતીનું હબ' નહીં પણ 'બુદ્ધિશક્તિ (AI) નું હબ' પણ બનશે.