નવી દિલ્હી:  ડિજિટલ શોપિંગના યુગમાં હવે સુરક્ષાના અત્યંત સંવેદનશીલ ઉપકરણો પણ સામાન્ય ઈલેક્ટ્રોનિક આઈટમ્સની જેમ ઓનલાઈન વેચાતા હોવાનું બહાર આવતા ખળભળાટ મચી ગયો છે. સેન્ટ્રલ કન્ઝ્યુમર પ્રોટેક્શન ઓથોરિટી (CCPA) એ ઈન્ડિયા માર્ટ, એક્સબૂમ અને એરવન રોબોટિક્સ જેવી છ મોટી ઈ-કોમર્સ કંપનીઓને કડક કારણદર્શક નોટિસ જારી કરી છે. આ કંપનીઓ કોઈપણ પ્રકારના માન્ય લાઇસન્સ કે સરકારી મંજૂરી વિના 'એન્ટી-ડ્રોન સિસ્ટમ' અને 'ડ્રોન જામર' વેચી રહી હતી. આ એવા ઉપકરણો છે જે રેડિયો ફ્રીક્વન્સી અને GPS સિગ્નલોને પળવારમાં વિક્ષેપિત કરી શકે છે, જેનો દુરુપયોગ રાષ્ટ્રીય સુરક્ષા માટે મોટો ખતરો સાબિત થઈ શકે છે.

આ ઉપકરણોની ગંભીરતા એટલી છે કે તે આસપાસ ઉડતા ડ્રોન અથવા સંવેદનશીલ સંરક્ષણ સિસ્ટમોના કાર્યને સંપૂર્ણપણે ઠપ્પ કરી શકે છે. ભારતીય વાયરલેસ ટેલિગ્રાફી અધિનિયમ મુજબ, આવા જામર્સનો ઉપયોગ કે વેચાણ સામાન્ય નાગરિકો માટે સખત મનાઈ છે અને તે માત્ર અધિકૃત સરકારી એજન્સીઓ માટે જ અનામત છે. તપાસમાં બહાર આવ્યું છે કે આ પ્લેટફોર્મ્સ પર ખરીદદારોને એવી કોઈ ચેતવણી આપવામાં આવી નહોતી કે આ ઉત્પાદનો ખરીદવા માટે વિશેષ પરવાનગીની જરૂર છે. CCPA એ હવે કંપનીઓ પાસે છેલ્લા બે વર્ષમાં આ જામર કોણે કોણે ખરીદ્યા છે તેની સંપૂર્ણ યાદી અને વેચાણના આંકડા માંગ્યા છે.

ટેકનોલોજીના નિષ્ણાતો માને છે કે જો આવા ઉપકરણો અસામાજિક તત્વોના હાથમાં આવી જાય, તો તે એરપોર્ટની સુરક્ષા અથવા વીવીઆઈપી મૂવમેન્ટમાં ગંભીર ખલેલ પહોંચાડી શકે છે. નોટિસમાં કંપનીઓને પૂછવામાં આવ્યું છે કે તેઓએ આ સંવેદનશીલ ઉત્પાદનો કયા સ્ત્રોતથી મેળવ્યા અને ગ્રાહકોને ગેરમાર્ગે દોરવા બદલ તેમની સામે કેમ કાયદેસરની કાર્યવાહી ન કરવી જોઈએ. આ ઘટનાએ ઓનલાઈન માર્કેટપ્લેસમાં વેચાતી પ્રોડક્ટ્સના 'સ્ક્રીનિંગ' પર મોટા સવાલો ઉભા કર્યા છે. આગામી દિવસોમાં આ મામલે કેન્દ્ર સરકાર વધુ કડક ગાઈડલાઈન્સ જાહેર કરે તેવી પૂરી શક્યતા છે.