લોસ એન્જલસ:  આર્ટિફિશિયલ ઇન્ટેલિજન્સ (AI) ની દુનિયામાં ચીને એક એવો વિસ્ફોટ કર્યો છે જેણે સીધી હોલીવુડની ઊંઘ હરામ કરી દીધી છે. ટિકટોકની માલિકી ધરાવતી કંપની બાઇટડાન્સ દ્વારા લોન્ચ કરવામાં આવેલ 'સીડેન્સ 2.0' (Seedance 2.0) નામનું નવું AI મોડેલ એટલું પાવરફુલ છે કે તે માત્ર એક નાનકડા પ્રોમ્પ્ટ પરથી હોલીવુડના દિગ્ગજ સિતારાઓના એકદમ વાસ્તવિક લાગે તેવા વિડીયો બનાવી રહ્યું છે. આ ટેકનોલોજી જોઈને મનોરંજન જગતના માંધાતાઓ હવે ચિંતામાં મુકાયા છે કે શું ભવિષ્યમાં અભિનેતાઓની જરૂર જ નહીં રહે?
વાયરલ વીડિયોએ સર્જ્યો વિવાદ
છેલ્લા કેટલાક દિવસોમાં ઇન્ટરનેટ પર વાહિયાત છતાં આશ્ચર્યજનક વિડીયો વાયરલ થયા છે. જેમાં ટોમ ક્રૂઝ અને બ્રેડ પિટ છત પર લડતા દેખાય છે, તો કાન્યે વેસ્ટ ચીની ભાષામાં ગીત ગાતો નૃત્ય કરે છે. આ તમામ વિડીયો 'સીડેન્સ 2.0' દ્વારા બનાવવામાં આવ્યા છે. તેની વાસ્તવિકતા એટલી સચોટ છે કે સામાન્ય માણસ માટે અસલી અને નકલી વચ્ચેનો તફાવત પારખવો અશક્ય બની રહ્યો છે.
હોલીવુડના દિગ્ગજો મેદાનમાં
આ વીડિયો સામે આવતા જ હોલીવુડની મોટી કંપનીઓ જેવી કે ડિઝની (Disney) અને પેરામાઉન્ટ (Paramount) એ બાઇટડાન્સને કડક શબ્દોમાં નોટિસ પાઠવી છે.
•    બૌદ્ધિક સંપત્તિનું ઉલ્લંઘન: કંપનીઓનો આરોપ છે કે બાઇટડાન્સે તેમની પરવાનગી વિના ફિલ્મી પાત્રો અને સ્ટાર્સના ચહેરાનો ઉપયોગ કર્યો છે.
•    SAG-AFTRA નો વિરોધ: અમેરિકન કલાકારોના યુનિયને પણ આ ટેકનોલોજીને કલાકારોની આજીવિકા પર સીધો હુમલો ગણાવી તેની નિંદા કરી છે.
ચીનનું ટેક-વર્ચસ્વ અને નિયંત્રણો
ચીન સરકાર આર્ટિફિશિયલ ઇન્ટેલિજન્સને પોતાની રાષ્ટ્રીય વિકાસ વ્યૂહરચનાનો મુખ્ય ભાગ માને છે. હાલમાં જ ચીની નવા વર્ષની ઉજવણીમાં રોબોટ્સ દ્વારા કરવામાં આવેલા કરતબોએ દુનિયાને પ્રભાવિત કરી હતી. જોકે, વધતા વિવાદોને જોતા બાઇટડાન્સે જણાવ્યું છે કે તેઓ બૌદ્ધિક સંપત્તિના રક્ષણ માટે કડક સુરક્ષા કવચ બનાવશે.
ચીનમાં પણ AI સામગ્રી માટેના નિયમો કડક બનાવવામાં આવ્યા છે. ચીની સાયબર એજન્સીએ ૧૩,૦૦૦ થી વધુ એકાઉન્ટ્સ પર કાર્યવાહી કરી છે જેઓ લેબલ વગરની AI સામગ્રી ફેલાવતા હતા.
શું આ હોલીવુડનો અંત છે?
'ડેડપૂલ' જેવી ફિલ્મોના લેખક રેટ્ટ રીસે આ ટેકનોલોજી જોઈને સોશિયલ મીડિયા પર લખ્યું કે, "મારું માનવું છે કે હોલીવુડમાં હવે ક્રાંતિ અથવા તો વિનાશ થવાનો છે." આ ટેકનોલોજી જેટલી ઝડપથી વિકસી રહી છે, તેટલી જ ઝડપે 'ડીપફેક' અને પ્રાઈવસીના જોખમો પણ વધી રહ્યા છે. હવે સવાલ એ છે કે શું ટેકનોલોજીની આ રેસમાં માનવીય કલા જીવંત રહેશે કે પછી બધું જ AI ના તાલે નાચશે?