વોશિંગ્ટન: અમેરિકાના પ્રમુખ ડોનાલ્ડ ટ્રમ્પના પ્રભાવ હેઠળ હવે ફ્લોરિડાનું આકાશ પણ તેમના નામે ગુંજશે. રિયલ એસ્ટેટ કિંગ અને રાષ્ટ્રપતિ ડોનાલ્ડ ટ્રમ્પની અભૂતપૂર્વ છાપ છોડવાના પ્રયાસોના ભાગરૂપે, ફ્લોરિડાના પ્રખ્યાત પામ બીચ ઇન્ટરનેશનલ એરપોર્ટનું નામ બદલવાનો ઐતિહાસિક નિર્ણય લેવામાં આવ્યો છે. રાજ્યની રિપબ્લિકન નેતૃત્વવાળી વિધાનસભાએ આ પ્રસ્તાવિત બિલને લીલી ઝંડી આપી દીધી છે.
માર-એ-લાગોથી માત્ર થોડી મિનિટોનું અંતર
પામ બીચ એરપોર્ટ, જે તેના લક્ઝરી રિસોર્ટ્સ અને સોનેરી દરિયાકિનારા માટે વિશ્વભરમાં જાણીતું છે, તે ડોનાલ્ડ ટ્રમ્પના ખાનગી નિવાસસ્થાન 'માર-એ-લાગો' થી ખૂબ જ નજીક આવેલું છે. હવે આ એરપોર્ટ સત્તાવાર રીતે "પ્રેસિડેન્ટ ડોનાલ્ડ જે. ટ્રમ્પ ઇન્ટરનેશનલ એરપોર્ટ" તરીકે ઓળખાશે. એક સમયે ટ્રમ્પના કટ્ટર હરીફ રહેલા ગવર્નર રોન ડીસેન્ટિસ પણ આ બિલ પર હસ્તાક્ષર કરવા માટે તૈયાર હોવાનું મનાય છે.
નામકરણની નવી લહેર: કેનેડી સેન્ટર પણ બન્યું ‘ટ્રમ્પ-કેનેડી’
ટ્રમ્પની બ્રાન્ડિંગની ભૂખ માત્ર એરપોર્ટ પૂરતી સીમિત નથી. વોશિંગ્ટનમાં આવેલા પ્રખ્યાત કલા સંકુલ 'કેનેડી સેન્ટર' ના બોર્ડે પણ તેનું નામ બદલીને "ટ્રમ્પ-કેનેડી સેન્ટર" રાખવા માટે મતદાન કર્યું છે. આ ઉપરાંત, ટ્રમ્પે ન્યૂયોર્કના પેન સ્ટેશન અને વોશિંગ્ટનના ડલ્સ એરપોર્ટ પર પણ પોતાનું નામ લગાવવાની ઈચ્છા વ્યક્ત કરી હતી, જોકે ત્યાં સફળતા મળી શકી ન હતી.
ચલણી સિક્કા પર પણ ટ્રમ્પની છબી?
સૌથી વધુ ચર્ચિત બાબત એ છે કે, અમેરિકન ટ્રેઝરી ડિપાર્ટમેન્ટ દ્વારા ૧ ડોલરના ખાસ સ્મારક સિક્કાનો ડ્રાફ્ટ તૈયાર કરવામાં આવ્યો છે, જેમાં ડોનાલ્ડ ટ્રમ્પની છબી હશે. સામાન્ય રીતે અમેરિકામાં જીવિત રાષ્ટ્રપતિની તસવીર ચલણ પર મૂકવા સામે કાયદાકીય અવરોધો છે, પરંતુ ટ્રમ્પ વહીવટીતંત્ર આ દિશામાં પણ ગંભીરતાથી વિચારી રહ્યું છે.
આ ફેરફાર માટે હવે માત્ર 'ફેડરલ એવિએશન એડમિનિસ્ટ્રેશન' (FAA) ની આખરી મંજૂરીની રાહ જોવાઈ રહી છે. જો બધું યોજના મુજબ ચાલ્યું, તો ટૂંક સમયમાં જ પ્રવાસીઓ ટ્રમ્પના નામવાળા રનવે પર ઉતરાણ કરશે.