અકોલા:  મહારાષ્ટ્રના અકોલા જિલ્લામાં લોરેન્સ બિશ્નોઈ ગેંગના નામે આંતરરાષ્ટ્રીય ખંડણી કોલ્સ આવતા સમગ્ર વહીવટીતંત્રમાં દોડધામ મચી ગઈ છે. અકોલા પશ્ચિમના કોંગ્રેસ ધારાસભ્ય સાજિદ ખાન પઠાણને અમેરિકાના એક આંતરરાષ્ટ્રીય નંબર પરથી ફોન કરીને અધધ ₹૧૦ કરોડની ખંડણી માંગવામાં આવી છે. આટલું જ નહીં, અકોટના ભાજપ શહેર પ્રમુખ હરીશ તાવારી પાસેથી પણ ₹૨ કરોડની માંગણી કરવામાં આવી છે. ફોન કરનારે ધમકી આપી છે કે જો નિર્ધારિત સમયમાં પૈસા નહીં પહોંચે તો ધારાસભ્ય અને તેમના પરિવારને જાનથી મારી નાખવામાં આવશે. આ ઘટના બાદ અકોલા પોલીસ એક્શન મોડમાં આવી ગઈ છે અને સાયબર નિષ્ણાતોની મદદ લેવામાં આવી રહી છે.

ધારાસભ્ય સાજિદ ખાન પઠાણે આ ગંભીર ધમકી બાદ ગૃહમંત્રી દેવેન્દ્ર ફડણવીસને પત્ર લખીને પોતાની અને પરિવારની સુરક્ષા વધારવા વિનંતી કરી છે. તેમણે જણાવ્યું કે જનપ્રતિનિધિ હોવાના નાતે તેમને રોજ સેંકડો લોકોને મળવું પડે છે, પરંતુ હાલની સુરક્ષા અપૂરતી હોવાથી તેમને 'Y-કેટેગરી'ની સુરક્ષા પૂરી પાડવામાં આવે. પોલીસ તપાસમાં બહાર આવ્યું છે કે ફોન કરનાર વ્યક્તિએ પોતાની ઓળખ ગેંગ સાથે સંકળાયેલા 'શુભમ લોંકર' તરીકે આપી છે. ક્રાઈમ બ્રાન્ચ અત્યારે વોઈસ સેમ્પલ અને કોલ ડિટેલ રેકોર્ડ (CDR) ની બારીકાઈથી તપાસ કરી રહી છે જેથી આ આંતરરાષ્ટ્રીય નેટવર્કનો પર્દાફાશ થઈ શકે.

અકોટ અને અકોલા પશ્ચિમ એમ બંને વિસ્તારોમાં એફઆઈઆર (FIR) નોંધીને તપાસ તેજ કરવામાં આવી છે. પોલીસ પ્રવક્તા શંકર શેલ્કેના જણાવ્યા અનુસાર, કોલ આંતરરાષ્ટ્રીય સર્વર દ્વારા કરવામાં આવ્યા હોવાથી સાયબર એજન્સીઓ સાથે સંકલન સાધવામાં આવી રહ્યું છે. અકોલામાં આ પ્રકારની આંતરરાષ્ટ્રીય ખંડણીની માંગણીથી રાજકીય નેતાઓમાં ફફડાટ વ્યાપી ગયો છે. હાલમાં બંને નેતાઓના નિવાસસ્થાને વધારાનો પોલીસ બંદોબસ્ત તૈનાત કરી દેવામાં આવ્યો છે અને લોકોને અફવાઓથી દૂર રહેવા અપીલ કરવામાં આવી છે.