મુંબઈ:: આજના ડિજિટલ યુગમાં સોશિયલ મીડિયાનું વ્યસન બાળકોના માનસિક સ્વાસ્થ્ય માટે ખતરો બની રહ્યું છે. ત્યારે બોલિવૂડ અભિનેતા કુણાલ કપૂરે શનિવારે બાળકોના સોશિયલ મીડિયા એક્સેસ પર પ્રતિબંધ મૂકવાની તરફેણ કરીને એક નવી ચર્ચા છેડી છે. કુણાલે સ્પષ્ટ કર્યું હતું કે તેઓ ટેકનોલોજીના વિરોધી નથી, પરંતુ બાળકોના ઉછેર અને તેમના સારા ભવિષ્ય માટે આ અત્યંત જરૂરી છે.
કેમ ચિંતામાં છે કુણાલ કપૂર?
કુણાલ કપૂરના મતે, સોશિયલ મીડિયાના 'અલ્ગોરિધમ્સ' એવી રીતે બનાવવામાં આવ્યા છે કે જે બાળકોને કલાકો સુધી સ્ક્રીન સામે જકડી રાખે છે. આનાથી તેમની એકાગ્રતા, ઊંઘ અને ભાવનાત્મક સ્થિરતા પર ખરાબ અસર પડે છે. કુણાલે સોશિયલ મીડિયા પર એક અહેવાલ શેર કરતા લખ્યું, "આપણા દેશને આની સખત જરૂર છે. બાળકોને વ્યસન પેદા કરનારા અલ્ગોરિધમ્સથી સુરક્ષિત રાખવા જોઈએ."
સરકારનો માસ્ટરપ્લાન: IT નિયમોમાં સુધારો
કેન્દ્ર સરકાર હાલમાં ૧.૪ અબજની વસ્તી ધરાવતા ભારતમાં ૧૬ વર્ષથી ઓછી ઉંમરના બાળકો માટે સોશિયલ મીડિયા પર પ્રતિબંધ મૂકવા માટે ઇન્ફોર્મેશન ટેકનોલોજી નિયમો, ૨૦૨૧ માં મોટા સુધારા કરવાનું વિચારી રહી છે. ઓસ્ટ્રેલિયામાં બાળકો માટે સોશિયલ મીડિયા પર મુકાયેલા સંપૂર્ણ પ્રતિબંધ બાદ ભારત સરકાર પણ આ દિશામાં ગંભીરતાથી વિચાર કરી રહી છે.
સ્વદેશી પ્લેટફોર્મ માટેની તક
કુણાલ કપૂરે એક નવીન વિચાર પણ રજૂ કર્યો છે. તેમણે કહ્યું કે જો આ પ્રતિબંધ આવે છે, તો તે આપણને એવા ‘ઘરેલુ પ્લેટફોર્મ’ બનાવવાની તક આપશે જે માત્ર લોકોને જોડવા માટે નહીં, પરંતુ બાળકોના વ્યક્તિગત વિકાસ અને શિક્ષણ પર ધ્યાન કેન્દ્રિત કરે.
બોલિવૂડના અન્ય સિતારાઓનું પણ સમર્થન
સોશિયલ મીડિયાના નકારાત્મક પ્રભાવ વિશે અગાઉ સોનાક્ષી સિંહા, સોનુ સૂદ અને શિલ્પા શેટ્ટી જેવી હસ્તીઓએ પણ ચિંતા વ્યક્ત કરી હતી. આ સેલિબ્રિટીઓનું માનવું છે કે AI (આર્ટિફિશિયલ ઇન્ટેલિજન્સ) અને સોશિયલ મીડિયાના દુરુપયોગથી બાળકોનું બાળપણ છીનવાઈ રહ્યું છે.