વોશિંગ્ટન: : અમેરિકાની સુપ્રીમ કોર્ટે રાષ્ટ્રપતિ ડોનાલ્ડ ટ્રમ્પના આક્રમક ટેરિફ વહીવટ સામે શુક્રવારે એક અત્યંત મહત્વપૂર્ણ ચુકાદો આપ્યો છે. કોર્ટે ટ્રમ્પ દ્વારા લાદવામાં આવેલા ટેરિફના એક મોટા જથ્થાને ગેરકાયદેસર ઠેરવીને રદ કરી દીધો છે. જોકે, આ ચુકાદા છતાં અમેરિકામાં મોંઘવારીમાં તાત્કાલિક રાહ મળવાની શક્યતા ઓછી છે, કારણ કે હજુ પણ અનેક મહત્વના ઉદ્યોગો પર ઊંચા આયાત વેરા યથાવત રાખવામાં આવ્યા છે.
સુપ્રીમ કોર્ટનો ઝટકો: અધિકાર ક્ષેત્રની બહાર ગયા ટ્રમ્પ
સુપ્રીમ કોર્ટે ૬-૩ના નિર્ણયમાં ચુકાદો આપ્યો કે, વેપાર અસંતુલન અને ફેન્ટાનાઇલ ડ્રગ્સની દાણચોરી રોકવા માટે ટ્રમ્પે જે IEEPA (ઇન્ટરનેશનલ ઇમરજન્સી ઇકોનોમિક પાવર્સ એક્ટ) હેઠળ ટેરિફ લાદ્યા હતા, તે તેમના રાષ્ટ્રપતિ તરીકેના અધિકારોનું ઉલ્લંઘન છે. આ હાર બાદ ટ્રમ્પે ન્યાયાધીશો પર ‘દેશભક્તિહીન’ હોવાનો આરોપ લગાવીને આકરા પ્રહારો કર્યા છે. જોકે, કોર્ટે કલમ ૨૩૨ (રાષ્ટ્રીય સુરક્ષા જોગવાઈ) હેઠળના ટેરિફને રદ કર્યા નથી, જેનો ફાયદો ઉઠાવી ટ્રમ્પ હજુ પણ ઘણા વેરા વસૂલી રહ્યા છે.
ઓટો સેક્ટર પર સંકટ: કાર અને પાર્ટ્સ થશે મોંઘા
વિદેશી વાહનો અને ઓટો પાર્ટ્સ પર હજુ પણ ૨૫% ટેરિફ યથાવત છે. આનો સીધો ફટકો મોટી કંપનીઓને પડી રહ્યો છે:
•    મર્સિડીઝ-બેન્ઝ: ટેરિફને કારણે ૧.૨ અબજ ડોલરનું નુકસાન થતા ૨૦૨૫ની કમાણી અડધી થઈ ગઈ છે.
•    ફોર્ડ: ગયા વર્ષે ૨ અબજ ડોલરનું ટેરિફ બિલ ચૂકવ્યું અને આ વર્ષે પણ આટલા જ બોજની અપેક્ષા છે.
•    GM અને નિસાન: આ કંપનીઓએ પણ અબજો ડોલરના વધારાના ખર્ચની જાણ કરી છે, જેના કારણે અંતે ગ્રાહકોના ખિસ્સા પર ભાર વધશે.
ફર્નિચર અને સ્ટીલ: સામાન્ય ઘરોને પણ અસર
અમેરિકનો માટે ઘર સજાવવું પણ મોંઘું બનશે, કારણ કે સોફા, કિચન કેબિનેટ અને વેનિટી પર લાદવામાં આવેલો ૨૫% ટેરિફ યથાવત છે, જે ૨૦૨૭ સુધીમાં વધીને ૫૦% થવાની શક્યતા છે. આ ઉપરાંત, સ્ટીલ અને એલ્યુમિનિયમ પર ૫૦% ટેરિફ ચાલુ હોવાથી સોડા કેન, બીયર કેન અને ઘરવપરાશના ઇલેક્ટ્રોનિક્સ ઉપકરણોના ભાવ આસમાને પહોંચી શકે છે.
ટેકનોલોજી અને ફાર્મા પર નજર
સેમિકન્ડક્ટર અને ચિપમેકિંગ સાધનો પર ગયા મહિને જ અમલમાં આવેલા ૨૫% ટેરિફ પણ ચાલુ રહેશે. જોકે, ફાર્માસ્યુટિકલ ઉદ્યોગમાં મોટી કંપનીઓ સાથેના સોદા બાદ ટ્રમ્પે હાલમાં ૨૫૦% સુધીના જંગી ટેરિફ ટાળ્યા છે, પરંતુ જો ભવિષ્યમાં તેઓ આયાત કર લાદશે તો તે કલમ ૨૩૨ હેઠળ હોવાથી તેને કોર્ટમાં પડકારવો મુશ્કેલ બનશે.
આ ચુકાદાથી યુએસ પરિવારોને અંદાજે $૯૦૦ની બચત થવાની આશા છે, પરંતુ ટ્રમ્પના નવા વૈશ્વિક ટેરિફ પર હસ્તાક્ષર કરવાની જાહેરાતે ફરીથી બજારમાં ચિંતા વધારી દીધી છે.