અમદાવાદ: : રોકાણકારો અને લગ્નસરાની ખરીદી કરનારાઓ માટે આ અઠવાડિયું આંચકાજનક રહ્યું છે. સોના અને ચાંદીના ભાવમાં રોકેટ ગતિએ વધારો જોવા મળ્યો છે. ઇન્ડિયા બુલિયન જ્વેલર્સ એસોસિએશન (IBJA) ના આંકડા મુજબ, છેલ્લા સાત દિવસમાં સોનામાં પ્રતિ ૧૦ ગ્રામ ₹૨,૩૦૦ થી વધુ અને ચાંદીમાં પ્રતિ કિલોએ લગભગ ₹૮,૦૦૦ નો તોતિંગ વધારો ઝીંકાયો છે.
સોનાના ભાવમાં ઐતિહાસિક તેજી
૨૪ કેરેટ સોનાનો ભાવ હવે સામાન્ય માણસની પહોંચથી દૂર જઈ રહ્યો હોય તેમ લાગે છે. આ અઠવાડિયે ભાવમાં જે ઉછાળો આવ્યો છે તેના પર એક નજર:
•    ૨૪ કેરેટ સોનું: ₹૧,૫૫,૦૬૬ પ્રતિ ૧૦ ગ્રામ (ગયા સપ્તાહે ₹૧,૫૨,૭૬૫ હતું).
•    ૨૨ કેરેટ સોનું: ₹૧,૪૨,૦૪૦ પ્રતિ ૧૦ ગ્રામ (જ્વેલરી માટે વપરાતું સોનું).
•    ૧૮ કેરેટ સોનું: ₹૧,૧૬,૩૦૦ પ્રતિ ૧૦ ગ્રામ પર પહોંચ્યું છે.
ચાંદીમાં પણ ‘ચમકાટ’: કિલોનો ભાવ ₹૨.૫૦ લાખ
સોનાની સાથે સાથે ચાંદી પણ મોંઘીદાટ થઈ છે. એક જ અઠવાડિયામાં ચાંદીના ભાવ ₹૭,૮૮૧ વધીને ₹૨,૫૦,૩૧૪ પ્રતિ કિલો ની ઊંચી સપાટીએ પહોંચી ગયા છે. ૨૦ ફેબ્રુઆરીએ ચાંદી તેના અત્યાર સુધીના સૌથી ઉંચા સ્તરે જોવા મળી હતી.
કેમ વધી રહ્યા છે ભાવ?
બજારના નિષ્ણાતોના મતે, આ તેજી પાછળ મુખ્યત્વે આંતરરાષ્ટ્રીય કારણો જવાબદાર છે:
૧. ભૌગોલિક તણાવ: અમેરિકા અને ઈરાન વચ્ચે વધી રહેલા ગજગ્રાહને કારણે વૈશ્વિક બજારમાં અસ્થિરતા છે, જેનાથી સુરક્ષિત રોકાણ તરીકે સોનાની માંગ વધી છે.
૨. વૈશ્વિક બજાર: આંતરરાષ્ટ્રીય સ્તરે સોનું $૫,૦૮૦ પ્રતિ ઔંસ અને ચાંદી $૮૨.૩૪ પ્રતિ ઔંસ પર ટ્રેડ થઈ રહ્યા છે.
ખરીદદારોની હાલત કફોડી
૧૭ ફેબ્રુઆરીએ જે સોનું ₹૧,૫૧,૧૯૫ પર હતું તે ૨૦ ફેબ્રુઆરી સુધીમાં ₹૧.૫૫ લાખને પાર કરી ગયું છે. લગ્નગાળાની સીઝન હોવાથી મધ્યમ વર્ગના પરિવારો માટે સોનું ખરીદવું હવે એક પડકાર બની ગયું છે. જ્વેલર્સનું કહેવું છે કે ભાવ વધારાને કારણે ગ્રાહકો અત્યારે માત્ર અનિવાર્ય હોય તેટલી જ ખરીદી કરી રહ્યા છે.