જોધપુર: રાજસ્થાનના જોધપુર પાસે આવેલા મણાઈ ગામમાં આજે એક એવી ઘટના બની જેણે પથ્થર હૃદયના માનવીને પણ હચમચાવી દીધા છે. જે ઘરના આંગણે શરણાઈઓ વાગી રહી હતી અને જ્યાં થોડી જ વારમાં લગ્નની જાન આવવાની હતી, ત્યાં એકસાથે બે સગી બહેનોના મૃતદેહ નીકળતા સમગ્ર વિસ્તારમાં સન્નાટો છવાઈ ગયો હતો. શોભા અને વિમલા નામની બે બહેનોએ લગ્નની વિધિઓ વચ્ચે જ ઝેર પીને પોતાનું જીવન ટૂંકાવી લીધું છે.
ખુશીઓ વચ્ચે ખેલાયો ‘મોતનો ખેલ’
જાણકારી મુજબ, શુક્રવારે રાત્રે ઘરમાં લગ્નની ‘બંદોલી’ વિધિ પૂરજોશમાં ચાલી રહી હતી. પરિવારજનો અને સંબંધીઓ નાચતા-ગાતા હતા. રાત્રે ૧ વાગ્યે બંને બહેનો રૂમમાં સૂવા ગઈ હતી, પરંતુ વહેલી સવારે ૪ વાગ્યાની આસપાસ તેમની તબિયત લથડી હતી. હોસ્પિટલ પહોંચે તે પહેલા જ બંનેએ અંતિમ શ્વાસ લીધા હતા. સૌથી ચોંકાવનારી વાત એ છે કે પરિવારે પોલીસને જાણ કર્યા વગર જ ગુપચુપ અંતિમ સંસ્કારની તૈયારીઓ શરૂ કરી દીધી હતી.
મામાના આક્ષેપો: સગાઈનું દબાણ અને કૌટુંબિક વિવાદ
આ ઘટનામાં ત્યારે નવો વળાંક આવ્યો જ્યારે મૃતક બહેનોની નાની બહેને છૂપી રીતે તેના મામા જસવંત સિંહને ફોન કર્યો. મામાએ તાત્કાલિક પોલીસને જાણ કરી અને સ્મશાને પહોંચતા અટકાવ્યા. જસવંત સિંહનો ગંભીર આરોપ છે કે:
•    સગાઈમાં ફેરફાર: બહેનોની સગાઈ પહેલા અન્ય જગ્યાએ હતી, જે તોડીને પરાણે પોખરણના જેમલા ગામમાં કરી દેવામાં આવી હતી.
•    માનસિક ત્રાસ: દીપ સિંહ (પિતા) ના ભાઈઓ દ્વારા બંને બહેનો પર લગ્ન માટે ભારે દબાણ કરવામાં આવતું હતું.
•    ઉશ્કેરણી: મામાનો સીધો દાવો છે કે જીજાના નાના ભાઈએ બંને ભાણિઓને આત્મહત્યા કરવા મજબૂર કરી છે.
શિક્ષિકા બહેનોના કરુણ અંજામથી સવાલો
મૃતક બંને બહેનો વ્યવસાયે ખાનગી શાળામાં શિક્ષિકા હતી અને શિક્ષિત હતી. સમાજમાં સન્માન ધરાવતી આ બહેનોએ આવું અંતિમ પગલું કેમ ભર્યું? શું ખરેખર સામાજિક પ્રતિષ્ઠા ખાતર દીકરીઓના મન વિરુદ્ધ કરવામાં આવતા લગ્ન જવાબદાર છે?
પોલીસે હાલ બંને મૃતદેહોનો કબજો મેળવી પોસ્ટમોર્ટમ માટે મોકલ્યા છે. પોલીસ અધિકારીઓના જણાવ્યા મુજબ, પોસ્ટમોર્ટમ રિપોર્ટ અને એફઆઈઆર બાદ સત્ય બહાર આવશે કે આ આત્મહત્યા હતી કે તેની પાછળ કોઈ ઊંડું ષડયંત્ર.