બાહ્ય દિલ્હી:રાજધાની દિલ્હીના મોડેલ ટાઉન સ્થિત ગુજરાંવાલા વિસ્તારમાં શનિવારની સાંજ ભય અને અફરાતફરીમાં ફેરવાઈ ગઈ હતી. પેન્ટામેડ હોસ્પિટલ પાસે આવેલી એક ચાર માળની રહેણાંક ઈમારતમાં અચાનક આગ ફાટી નીકળતા આસપાસના વિસ્તારમાં ગભરાટ ફેલાયો હતો. ત્રીજા માળે શોર્ટ સર્કિટના કારણે લાગેલી આગ જોતજોતામાં ચોથા માળ સુધી પ્રસરી ગઈ હતી, જેના કારણે આખી બિલ્ડિંગ કાળા ધુમાડાના ગોટેગોટામાં ગરકાવ થઈ ગઈ હતી. ઈમારતમાં હાજર ડઝન જેટલા લોકો જીવ બચાવવા બહાર દોડી આવ્યા હતા, પરંતુ ૮૦ વર્ષના એક અશક્ત વૃદ્ધા અને એક પાલતુ કૂતરો અંદર જ મોતની જાળમાં ફસાઈ ગયા હતા.

આ કપરી પરિસ્થિતિમાં દિલ્હી પોલીસના હેડ કોન્સ્ટેબલ રાજ કુમાર સાચા ‘સુપરહીરો’ સાબિત થયા હતા. આગની જ્વાળાઓ અને ગૂંગળાવી નાખતા ધુમાડાની પરવા કર્યા વગર તેઓ ઈમારતમાં ઘૂસ્યા હતા અને ૮૦ વર્ષીય મહિલાને હેમખેમ સીડીઓ વાટે નીચે ઉતારી લાવ્યા હતા. આટલું જ નહીં, તેમણે ત્યાં ફસાયેલા એક મૂંગા જીવ એવા કૂતરાને પણ નવજીવન આપ્યું હતું. પોલીસની આ બહાદુરીને જોઈ ત્યાં હાજર લોકોએ તાળીઓના ગડગડાટથી તેમને વધાવી લીધા હતા.

ઘટનાની જાણ થતા જ ફાયર બ્રિગેડની ૧૦ ગાડીઓ ઘટનાસ્થળે પહોંચી ગઈ હતી. લગભગ સાડા ચાર કલાકની કાળઝાળ મહેનત બાદ રાત્રે ૧૦ વાગ્યાની આસપાસ આગ પર સંપૂર્ણ કાબુ મેળવી શકાયો હતો. પ્રાથમિક તપાસમાં આગનું કારણ ઈલેક્ટ્રિક શોર્ટ સર્કિટ હોવાનું મનાય છે. બીજી તરફ, રોહિણી સેક્ટર-૨૨ માં પણ એક દૂધના બૂથમાં આગ લાગવાની ઘટના બની હતી, જોકે ત્યાં કોલેજ કેમ્પસના જાગૃત સ્ટાફે ફાયર સેફ્ટીના સાધનો વડે મોટી દુર્ઘટના અટકાવી દીધી હતી.