નવી દિલ્હી:અમેરિકામાં રાષ્ટ્રપતિ ડોનાલ્ડ ટ્રમ્પની આક્રમક વેપાર નીતિ અને ન્યાયતંત્ર વચ્ચે સર્જાયેલા સંઘર્ષે સમગ્ર વિશ્વના બજારોમાં હલચલ મચાવી દીધી છે. ટ્રમ્પે 'ઓવલ ઓફિસ' થી તમામ દેશો પર તાત્કાલિક અસરથી ૧૦ ટકા વૈશ્વિક ટેરિફ ઝીંકતા દસ્તાવેજ પર હસ્તાક્ષર કરીને ચોંકાવી દીધા હતા, પરંતુ અમેરિકન સુપ્રીમ કોર્ટે આ નિર્ણયને ગેરકાનૂની ઠેરવી ટ્રમ્પને મોટો આંચકો આપ્યો છે. કોર્ટે સ્પષ્ટ શબ્દોમાં જણાવ્યું છે કે રાષ્ટ્રપતિએ નેશનલ ઇમરજન્સી કાયદાનો દુરુપયોગ કરીને પોતાના અધિકારોનું ઉલ્લંઘન કર્યું છે. આ કાયદાકીય જંગ વચ્ચે ભારત સરકારે પણ સક્રિયતા બતાવી છે.

વાણિજ્ય મંત્રાલયે શનિવારે એક નિવેદન જાહેર કરીને જણાવ્યું છે કે, તેઓ અમેરિકન સુપ્રીમ કોર્ટના ચુકાદા અને વ્હાઈટ હાઉસ દ્વારા કરવામાં આવેલી ત્યારબાદની જાહેરાતો પર ખૂબ જ બારીકાઈથી નજર રાખી રહ્યા છે. ભારત માટે અમેરિકા એક મોટું નિકાસ બજાર છે, તેથી જો ૧૦ ટકા ટેરિફ અમલમાં આવે તો ભારતીય આઈટી (IT), ફાર્મા અને ટેક્સટાઈલ સેક્ટરને સીધી અસર થઈ શકે છે. મંત્રાલય અત્યારે ભારતીય વેપાર અને ઉદ્યોગ જગત પર આ 'ટ્રેડ વોર' ની કેટલી અને કેવી અસર પડશે તેનું ઊંડું મૂલ્યાંકન કરી રહ્યું છે.

ટ્રમ્પની આ વેપાર નીતિને કારણે ગ્લોબલ ટ્રેડ વોર જેવી સ્થિતિ ઊભી થઈ છે, જે વૈશ્વિક અર્થવ્યવસ્થાને અસ્થિર કરી શકે છે. સુપ્રીમ કોર્ટે ટેરિફને 'અનલૉફુલ' જાહેર કર્યા હોવા છતાં ટ્રમ્પ પોતાના નિર્ણય પર મક્કમ દેખાઈ રહ્યા છે. હવે જોવાનું એ રહેશે કે ભારત સરકાર પોતાના નિકાસકારોના હિતોનું રક્ષણ કરવા માટે અમેરિકા સાથે કેવી રીતે રાજદ્વારી વાટાઘાટો કરે છે. આગામી દિવસોમાં આ મામલે વાણિજ્ય મંત્રાલય ઉદ્યોગ જગતના અગ્રણીઓ સાથે બેઠક યોજીને મહત્વની રણનીતિ ઘડે તેવી શક્યતા છે.