નવી દિલ્હી: દેશની રાજધાની દિલ્હીમાં મેટ્રો કનેક્ટિવિટીને વધુ મજબૂત કરવા માટે એક મોટા પ્રોજેક્ટ પર કામ શરૂ થવા જઈ રહ્યું છે, પરંતુ તેની સીધી અસર મધ્ય દિલ્હીના ટ્રાફિક પર પડશે. દિલ્હી ટ્રાફિક પોલીસે શનિવારે એક મહત્વપૂર્ણ એડવાઈઝરી જારી કરતા જણાવ્યું છે કે, લુટિયન્સ ઝોનમાં આવેલો પંડિત પંત માર્ગ (GRG સર્કલ અને PM સર્કલ વચ્ચેનો ભાગ) આવતા સોમવાર એટલે કે ૨૩ ફેબ્રુઆરી, ૨૦૨૬ થી આગામી એક વર્ષ માટે સામાન્ય ટ્રાફિક માટે સંપૂર્ણપણે બંધ રહેશે. અહીં "યુગે યુગિન ભારત" નામનું અદ્યતન અંડરગ્રાઉન્ડ મેટ્રો સ્ટેશન બનાવવામાં આવનાર છે, જેને પગલે આગામી ૧૨ મહિના સુધી આ રસ્તો અવરજવર માટે ઉપલબ્ધ રહેશે નહીં.

દિલ્હીના આ વ્યસ્ત વિસ્તારમાં ટ્રાફિક જામ ન સર્જાય તે માટે પોલીસે વિસ્તૃત ડાયવર્ઝન પ્લાન તૈયાર કર્યો છે. ગોલ ડાક ખાનાથી પંડિત પંત માર્ગ તરફ આવતા વાહનોએ હવે ડૉ. બિશંબર દાસ માર્ગ થઈને ગુરુદ્વારા રકાબ ગંજ રોડ (GRG રોડ) તરફ જવું પડશે અને ચર્ચ રોડ પર જવા માટે ચર્ચ લેનનો ઉપયોગ કરવો પડશે. તેવી જ રીતે, ચર્ચ રોડથી આવતા મુસાફરોને પણ વૈકલ્પિક રૂટ અપનાવવાની સલાહ આપવામાં આવી છે. પોલીસે સ્પષ્ટ કર્યું છે કે, જે લોકોએ ISBT, નવી દિલ્હી રેલવે સ્ટેશન કે એરપોર્ટ પહોંચવાનું હોય, તેમણે આ પ્રતિબંધોને ધ્યાનમાં રાખીને અગાઉથી મુસાફરીનું આયોજન કરવું જોઈએ.

ભીડ ઓછી કરવા માટે ટ્રાફિક પોલીસે સંસદ માર્ગ, પટેલ ચોક રાઉન્ડઅબાઉટ, અશોકા રોડ અને બાબા ખારક સિંહ માર્ગ જેવા વૈકલ્પિક રસ્તાઓ સૂચવ્યા છે. ટ્રાફિક પોલીસના મતે, આ મેટ્રો સ્ટેશનના નિર્માણથી ભવિષ્યમાં પરિવહન ઘણું સરળ બનશે, પરંતુ ત્યાં સુધી નાગરિકોને ધૈર્ય રાખવા અને બને ત્યાં સુધી જાહેર પરિવહન એટલે કે બસ કે મેટ્રોનો વધુ ઉપયોગ કરવા અપીલ કરવામાં આવી છે.