નવી દિલ્હી : યુએસ પ્રમુખ ડોનાલ્ડ ટ્રમ્પના ટેરિફ અંગેના આંચકાજનક નિર્ણયો અને મધ્ય પૂર્વમાં વધતા ભૂ-રાજકીય તણાવે ભારતીય શેરબજારને હાલમાં વમળમાં નાખ્યું છે. શુક્રવારે બજારે ૩૦૦ પોઈન્ટની રિકવરી સાથે શ્વાસ લીધો ખરો, પરંતુ સોમવારની સવાર રોકાણકારો માટે કેવી રહેશે તે અંગે હજુ પણ અનિશ્ચિતતાના વાદળો છવાયેલા છે. ટ્રમ્પ દ્વારા ટેરિફને ૧૮% થી ઘટાડીને ૧૫% કરવામાં આવ્યો છે, જે ભારત માટે થોડો રાહતનો સંકેત જરૂર છે, પરંતુ ઈરાન અને અમેરિકા વચ્ચેના સંઘર્ષને કારણે ક્રૂડ ઓઈલના વધતા ભાવ ભારતીય અર્થતંત્ર પર દબાણ વધારી રહ્યા છે. ખાસ કરીને આઈટી અને ટેક શેરોમાં જોવા મળેલું દબાણ હજુ શમ્યું નથી, જ્યારે બેંકિંગ અને મેટલ શેરોમાં ખરીદીનો ટેકો જોવા મળી રહ્યો છે.

નિષ્ણાતોના મતે, ૨૩ ફેબ્રુઆરીએ નિફ્ટી માટે ૨૫,૪૦૦ થી ૨૫,૩૫૦ નો ઝોન અત્યંત નિર્ણાયક સાબિત થશે. જો નિફ્ટી આ સ્તરની નીચે સરકશે, તો બજારમાં વધુ ૨૦૦ થી ૪૦૦ પોઈન્ટનો કડાકો જોવા મળી શકે છે જે ઈન્ડેક્સને ૨૫,૦૦૦ ના મનોવૈજ્ઞાનિક સ્તર સુધી ખેંચી જઈ શકે છે. બીજી તરફ, જો બજાર ૨૫,૭૦૦ ની સપાટી સફળતાપૂર્વક પાર કરે છે, તો એક નવી ‘રિલીફ રેલી’ જોવા મળી શકે છે. HDFC સિક્યોરિટીઝના નિષ્ણાતો માને છે કે હાલમાં રોલ રિવર્સલ થિયરી મુજબ અગાઉનો અવરોધ હવે સપોર્ટ તરીકે કામ કરી રહ્યો છે, જે બજારને સ્થિર કરવામાં મદદરૂપ થઈ શકે છે.

આગામી સપ્તાહમાં બજાર માત્ર ટેરિફ પર જ નહીં, પરંતુ ભારતના ત્રીજા ક્વાર્ટરના GDP ડેટા અને અમેરિકાના બેરોજગારીના આંકડા પર પણ નજર રાખશે. ભારત-અમેરિકા વચ્ચેના સંભવિત વેપાર સોદાઓ અને AI સમિટના પરિણામો બજારની લાંબી ગાળાની દિશા નક્કી કરશે. રોકાણકારોએ અત્યારે આક્રમક ખરીદી કરવાને બદલે સાવચેતીભર્યું વલણ અપનાવવું જોઈએ, કારણ કે અસ્થિરતા (Volatility) હજુ પણ ઉચ્ચ સ્તરે છે. બજાર અત્યારે ૨૫,૩૦૦ થી ૨૫,૮૦૦ ની એક મર્યાદિત રેન્જમાં કોન્સોલિડેશન કરે તેવી પ્રબળ શક્યતા છે.