વોશિંગ્ટન:અમેરિકામાં ચાલી રહેલા આંશિક સરકારી શટડાઉન વચ્ચે એરપોર્ટ સુરક્ષા સેવાઓને લઈને રવિવારે ભારે અસમંજસની સ્થિતિ જોવા મળી હતી. હોમલેન્ડ સિક્યોરિટી ડિપાર્ટમેન્ટ (DHS) દ્વારા 'TSA પ્રી-ચેક' અને 'ગ્લોબલ એન્ટ્રી' સેવાઓ સ્થગિત કરવાની જાહેરાત કરવામાં આવ્યાના ગણતરીના કલાકોમાં જ ટ્રાન્સપોર્ટ સિક્યોરિટી એડમિનિસ્ટ્રેશન (TSA) એ આ નિર્ણય પર રોક લગાવી દીધી છે. વિભાગે સ્પષ્ટતા કરી છે કે મુસાફરો માટે પ્રી-ચેક સુવિધા હાલમાં કાર્યરત રહેશે.
TSA દ્વારા સત્તાવાર સ્પષ્ટતા:
TSA ના પ્રવક્તાએ જણાવ્યું હતું કે, "અત્યારે મુસાફરી કરતી જનતા માટે TSA પ્રી-ચેક સુવિધામાં કોઈ ફેરફાર કરવામાં આવ્યો નથી અને તે કાર્યરત છે." અગાઉ સેક્રેટરી ક્રિસ્ટી નોએમે ફંડિંગના અભાવે આ સેવાઓ બંધ કરવાની વાત કરી હતી, પરંતુ એજન્સીએ હવે સ્પષ્ટ કર્યું છે કે જો ભવિષ્યમાં સ્ટાફની અછત જણાશે, તો દરેક એરપોર્ટની સ્થિતિ મુજબ કેસ-બાય-કેસ ધોરણે નિર્ણય લેવામાં આવશે.
સાંસદોની સુવિધામાં કાપ:
ભલે સામાન્ય મુસાફરો માટે પ્રી-ચેક લેન ચાલુ રાખવામાં આવી હોય, પરંતુ સુરક્ષા દળોએ અન્ય ક્ષેત્રોમાં કાપ મૂક્યો છે. અમેરિકન આકાશની સુરક્ષાના મુખ્ય મિશન પર ધ્યાન કેન્દ્રિત કરવા માટે કોંગ્રેસના સભ્યો (સાંસદો) ને એરપોર્ટ પર મળતા 'કર્ટસી એસ્કોર્ટ' એટલે કે વિશેષ સુરક્ષા પ્રોટોકોલ અને એસ્કોર્ટ સુવિધા હાલ પૂરતી સ્થગિત કરી દેવામાં આવી છે.
શટડાઉન અને વિવાદની પૃષ્ઠભૂમિ:
૧૪ ફેબ્રુઆરીથી ઈમિગ્રેશન સુધારા મુદ્દે ડેમોક્રેટ્સ અને રિપબ્લિકન વચ્ચે ફંડિંગ મામલે ચાલી રહેલા ગતિરોધને કારણે હોમલેન્ડ સિક્યોરિટી વિભાગમાં આંશિક શટડાઉન છે. TSA પ્રી-ચેક એક પેઇડ સર્વિસ છે (અંદાજે ૮૫ ડોલર ફી), જે નિયમિત મુસાફરોને સુરક્ષા તપાસમાં ઝડપી એક્ઝિટ અને બેગમાંથી લેપટોપ કાઢવા જેવી મુક્તિ આપે છે. અત્યારે ગ્લોબલ એન્ટ્રી સેવા ચાલુ રહેશે કે નહીં તે અંગે DHS પાસે સ્પષ્ટતા માંગવામાં આવી છે, પરંતુ પ્રી-ચેક ચાલુ રહેતા હજારો હવાઈ મુસાફરોએ રાહતનો શ્વાસ લીધો છે.