ફિલાડેલ્ફિયા, તા.૨૩: અમેરિકામાં ઉચ્ચ અભ્યાસ અર્થે ગયેલા આંતરરાષ્ટ્રીય વિદ્યાર્થીઓ માટે ચિંતાજનક અને મહત્વના સમાચાર સામે આવ્યા છે. વિશ્વવિખ્યાત પેન્સિલવેનિયા યુનિવર્સિટી (Penn) એ તેના તમામ વિદેશી વિદ્યાર્થીઓ અને સંશોધકોને એક ખાસ ઇમેઇલ મોકલીને હંમેશા પોતાની સાથે ઇમિગ્રેશનના દસ્તાવેજો રાખવાની તાકીદ કરી છે. યુનાઇટેડ સ્ટેટ્સમાં ફેડરલ એન્ફોર્સમેન્ટ એટલે કે કેન્દ્રીય તપાસ એજન્સીઓની કાર્યવાહી વધુ કડક બનતા યુનિવર્સિટીએ આ સાવચેતીભર્યું પગલું ભર્યું છે.
શહેરમાં ફોટોકોપી અને બહાર ઓરિજિનલ પેપર્સ જરૂરી
યુનિવર્સિટીની ઇન્ટરનેશનલ સ્ટુડન્ટ એન્ડ સ્કોલર સર્વિસીસ (ISSS) દ્વારા જારી કરાયેલા નિર્દેશો મુજબ, જો વિદ્યાર્થીઓ ફિલાડેલ્ફિયા શહેરની અંદર જ મુસાફરી કરી રહ્યા હોય, તો તેમણે પાસપોર્ટનું બાયોગ્રાફિકલ પેજ, વિઝા પેજ અને I-20 કે I-94 જેવા મહત્વના દસ્તાવેજોની ફોટોકોપી પોતાની પાસે રાખવી જોઈએ. જોકે, જો વિદ્યાર્થી શહેરની સીમા ઓળંગીને બહાર ક્યાંય પણ જાય, તો તેમણે ફરજિયાતપણે ઓરિજિનલ (અસલ) દસ્તાવેજો સાથે રાખવા પડશે.
OPT અને ગ્રીન કાર્ડ ધારકો માટે પણ સૂચના
જે વિદ્યાર્થીઓ હાલમાં 'ઓપ્શનલ પ્રેક્ટિકલ ટ્રેનિંગ' (OPT) પર છે, તેમણે તેમનું એમ્પ્લોયમેન્ટ ઓથોરાઇઝેશન કાર્ડ અને તેની ડિજિટલ નકલો સાથે રાખવી પડશે. આ ઉપરાંત, કાયમી રહેવાસીઓ એટલે કે ગ્રીન કાર્ડ ધારકોને પણ તેમનું કાર્ડ સાથે રાખવા જણાવાયું છે. યુનિવર્સિટીએ સ્પષ્ટ કર્યું છે કે કાયદા અમલીકરણ અધિકારીઓ સાથેના સંપર્ક દરમિયાન વિદ્યાર્થીઓએ 'શાંત અને આદરણીય' વર્તન રાખવું જોઈએ.
 
સાવધાન: ઇમિગ્રેશન કૌભાંડોથી બચો
યુનિવર્સિટીએ વિદ્યાર્થીઓને એવા ઠગબાજોથી પણ સાવધ કર્યા છે જેઓ ઇમિગ્રેશન અધિકારી હોવાનો ઢોંગ કરી પૈસા અથવા વ્યક્તિગત માહિતીની માંગણી કરે છે. કોઈપણ શંકાસ્પદ કોલ આવે તો તાત્કાલિક પબ્લિક સેફ્ટી વિભાગનો સંપર્ક કરવા જણાવાયું છે.
બદલાતી ઇમિગ્રેશન નીતિઓની અસર
નોંધનીય છે કે જૂન ૨૦૨૫ માં લાદવામાં આવેલા પ્રવાસ પ્રતિબંધો અને ત્યારબાદ ડિસેમ્બર ૨૦૨૫ માં બિન-જરૂરી આંતરરાષ્ટ્રીય પ્રવાસ ટાળવાની સલાહ બાદ આ નવી એડવાઇઝરી આવી છે. અમેરિકાના વિવિધ શહેરોમાં વધી રહેલા ઇમિગ્રેશન ચેકિંગને જોતા હવે ભારતીય વિદ્યાર્થીઓએ ખાસ કરીને વધુ સતર્ક રહેવાની જરૂર છે.