ઓટાવા, તા.૨૩: કેનેડા સરકાર દ્વારા આંતરરાષ્ટ્રીય વિદ્યાર્થીઓ માટે વિઝાના નિયમોમાં વધુ એક કડક ફેરફાર કરવામાં આવ્યો છે. ઇમિગ્રેશન, રેફ્યુજીસ અને સિટીઝનશિપ કેનેડા (IRCC) દ્વારા જારી કરવામાં આવેલા નવા માર્ગદર્શન મુજબ, જે વિદ્યાર્થીઓ મુખ્ય શૈક્ષણિક કાર્યક્રમ શરૂ કરતા પહેલા પૂર્વશરતી અભ્યાસક્રમો (જેમ કે અંગ્રેજી ભાષાનો ESL કોર્સ) લેવા માટે કેનેડા જાય છે, તેમની અભ્યાસ પરમિટના સમયગાળામાં મોટો કાપ મૂકવામાં આવ્યો છે.
શું છે આ નવો નિયમ?
અત્યાર સુધી એવો નિયમ હતો કે જો કોઈ વિદ્યાર્થીને શરતી પ્રવેશ (Conditional Admission) મળ્યો હોય, તો તેને અભ્યાસક્રમની લંબાઈ ઉપરાંત વધારાના એક વર્ષ માટે પરમિટ મળતી હતી. પરંતુ હવે, કેનેડા સરકાર માત્ર તમારા પ્રારંભિક કોર્સના સમયગાળા અને તેના પર વધારાના માત્ર 90 દિવસ સુધીની જ પરમિટ આપશે. એટલે કે, મુખ્ય ડિગ્રી કે ડિપ્લોમા કોર્સ શરૂ કરતા પહેલા તમારે ફરીથી નવી સ્ટડી પરમિટ માટે અરજી કરવી પડશે.
શા માટે આ ફેરફાર કરાયો?
કેનેડાની સરકારે આ ફેરફાર ઇમિગ્રેશન પ્રક્રિયાને વધુ પારદર્શક અને સુવ્યવસ્થિત બનાવવા માટે કર્યો છે. આ નિયમ ખાસ કરીને એવા વિદ્યાર્થીઓને લાગુ પડશે જેઓ નિયુક્ત શિક્ષણ સંસ્થામાં સીધો પ્રવેશ મેળવવા માટે પહેલા કોઈ લેંગ્વેજ કોર્સ અથવા અન્ય પૂર્વ-તૈયારીના અભ્યાસક્રમમાં જોડાય છે.
 
મુખ્ય ફેરફારો એક નજરે:
•    પરમિટની મુદત: હવે માત્ર 'કોર્સ લંબાઈ + 90 દિવસ' સુધી જ સીમિત.
•    નવી અરજી ફરજિયાત: પ્રારંભિક કોર્સ પૂરો થયા બાદ મુખ્ય પ્રોગ્રામ માટે દેશની અંદરથી જ નવી પરમિટ લેવી પડશે.
•    સાવચેતી: જો તમે ટૂંકા ગાળાના કોર્સ (6 મહિનાથી ઓછો) માટે જઈ રહ્યા હોવ અને તે લાંબા કોર્સ માટેની પૂર્વશરત હોય, તો પણ સ્ટડી પરમિટ લેવી હિતાવહ છે, નહીંતર કેનેડામાં રહીને નવી અરજી કરવામાં મુશ્કેલી પડી શકે છે.
 
કોણ કેનેડાની અંદરથી અરજી કરી શકશે?
નવા નિયમો મુજબ, માન્ય વર્ક પરમિટ ધરાવતા લોકો, વિદ્યાર્થીઓના જીવનસાથી (Spouse), એક્સચેન્જ વિદ્યાર્થીઓ અને જેમના કાયમી નિવાસ (PR) માટેના સ્પોન્સરશિપ ફોર્મ સબમિટ થઈ ગયા છે, તેઓ કેનેડાની અંદરથી જ સ્ટડી પરમિટ માટેની પ્રક્રિયા કરી શકશે.
આ ફેરફારથી ખાસ કરીને એવા ભારતીય વિદ્યાર્થીઓ પર અસર પડશે જેઓ સીધા એડમિશનને બદલે બ્રિજ કોર્સ અથવા લેંગ્વેજ પ્રોગ્રામ દ્વારા કેનેડા પહોંચે છે. હવે તેમણે કેનેડા પહોંચ્યા બાદ પણ દસ્તાવેજી પ્રક્રિયા માટે વધુ સજાગ રહેવું પડશે.