નવી દિલ્હી:  ભારતના કરોડો વોટ્સએપ યુઝર્સ માટે સોમવારનો દિવસ અત્યંત નિર્ણાયક સાબિત થવાનો છે. મેટા પ્લેટફોર્મ્સ અને વોટ્સએપ દ્વારા ડેટા શેરિંગની નીતિને લઈને ચાલી રહેલા વિવાદમાં હવે સુપ્રીમ કોર્ટ ‘ફુલ એક્શન’ મોડમાં છે. કોમ્પિટિશન કમિશન ઓફ ઇન્ડિયા (CCI) દ્વારા લાદવામાં આવેલા ₹૨૧૩.૧૪ કરોડના દંડ સામે કંપનીઓએ સુપ્રીમ કોર્ટના દરવાજા ખખડાવ્યા છે, પરંતુ કોર્ટે અગાઉની સુનાવણીમાં જે કડક વલણ અપનાવ્યું હતું તેનાથી ટેક કંપનીઓના શ્વાસ અધ્ધર થઈ ગયા છે. મુખ્ય ન્યાયાધીશ સૂર્યકાંતની આગેવાની હેઠળની બેન્ચે સ્પષ્ટ સંકેત આપ્યા છે કે ડિજિટલ યુગમાં કોઈપણ કંપનીને ગ્રાહકોની વ્યક્તિગત માહિતીનો વેપાર કરવાની પરવાનગી આપી શકાય નહીં.

કોર્ટે ખાસ કરીને એવા "મૌન ગ્રાહકો" વિશે ચિંતા વ્યક્ત કરી છે જેઓ અજાણતા જ પોતાની ખાનગી વિગતો મોટી કંપનીઓને સોંપી દે છે. સુપ્રીમ કોર્ટનું માનવું છે કે ડેટા શેરિંગના નામે બજારમાં એકાધિકાર ઉભો કરવો એ ગંભીર અપરાધ છે. આ કેસમાં હવે કેન્દ્ર સરકારના ઇલેક્ટ્રોનિક્સ અને માહિતી ટેકનોલોજી મંત્રાલયને પણ પક્ષકાર બનાવવામાં આવ્યું છે, જેથી ડિજિટલ સુરક્ષા અંગેના સરકારી કાયદાઓ અને નિયમો પર સ્પષ્ટતા થઈ શકે. ટ્રિબ્યુનલે ભલે દંડ યથાવત રાખ્યો હોય, પરંતુ CCI એ પણ ક્રોસ-અપીલ દાખલ કરીને માંગ કરી છે કે જાહેરાતના હેતુ માટે ડેટા શેરિંગ પર સંપૂર્ણ પ્રતિબંધ હોવો જોઈએ.

આ સુનાવણી માત્ર એક દંડ પૂરતી મર્યાદિત નથી, પરંતુ તે ભારતમાં ડિજિટલ પ્રાઇવસીના ભવિષ્યનો પાયો નાખશે. જો સુપ્રીમ કોર્ટ કોઈ કડક વચગાળાનો આદેશ પસાર કરશે, તો વોટ્સએપ અને મેટાએ તેમની બિઝનેસ મોડેલ અને ડેટા પોલિસીમાં મોટો ફેરફાર કરવો પડી શકે છે. યુઝર્સની પ્રાઇવસી સાથે જોડાયેલો આ ‘સુપર કેસ’ એ નક્કી કરશે કે ભારતીય નાગરિકોનો ડેટા કોઈ કંપનીની મિલકત છે કે તેમનો મૌલિક અધિકાર. સોમવારે કોર્ટના રૂમમાં થનારી દલીલો પર આખા વિશ્વની ટેક કંપનીઓની નજર ટકેલી છે.