રાજકોટ: હિન્દુ ધર્મમાં એકાદશીનું વ્રત સર્વોપરી માનવામાં આવે છે, તેમાં પણ હોળી પહેલા આવતી 'રંગભરી એકાદશી' (જેને આમલકી એકાદશી પણ કહેવાય છે) નું મહત્વ અનેરું છે. વર્ષ ૨૦૨૬ માં આ પવિત્ર એકાદશીનું વ્રત શ્રદ્ધાળુઓ માટે સુખ-સમૃદ્ધિના દ્વાર ખોલનારી બની રહેશે. ધાર્મિક માન્યતા અનુસાર, આ દિવસે ભગવાન વિષ્ણુની સાથે દેવાધિદેવ મહાદેવની પૂજા કરવાથી ભક્તોના તમામ કષ્ટો દૂર થાય છે. જોકે, શાસ્ત્રોક્ત વિધિ મુજબ વ્રત જેટલું મહત્વનું છે, તેટલા જ મહત્વના તેના પારણા (ઉપવાસ તોડવા) છે.
પારણાનો શુભ સમય અને મહત્વ
રંગભરી એકાદશીનું વ્રત કરનારા શ્રદ્ધાળુઓએ ખાસ નોંધ લેવી કે દ્વાદશી તિથિએ યોગ્ય સમયે ઉપવાસ તોડવો અનિવાર્ય છે. વર્ષ ૨૦૨૬ માં, એકાદશીનું વ્રત કર્યા બાદ ૨૮ ફેબ્રુઆરી ના રોજ પારણા કરવામાં આવશે. વ્રત તોડવાનો સૌથી શુભ સમય સવારે ૬:૪૭ થી ૯:૦૬ વાગ્યા સુધીનો રહેશે. આ સમયગાળા દરમિયાન વિધિવત પૂજા કર્યા બાદ જ અન્ન ગ્રહણ કરવું હિતાવહ છે.
પૂજન વિધિ અને વ્રત તોડવાની રીત
એકાદશીના દિવસે વહેલા ઉઠી સ્નાન કરી ભગવાન વિષ્ણુની મૂર્તિ સમક્ષ વ્રતનો સંકલ્પ કરવો. ભગવાનને પીળા ફૂલ, અબીલ-ગુલાલ અને આંબળા અર્પણ કરવા. બીજા દિવસે એટલે કે દ્વાદશીના સવારે ફરીથી પૂજા-આરતી કરવી. વ્રત ખોલતી વખતે સૌથી પહેલા ભગવાનનું ચરણામૃત ગ્રહણ કરવું જોઈએ. ત્યારબાદ બ્રાહ્મણોને ભોજન કરાવી અથવા સીધું (લોટ, દાળ, ચોખા) અને યથાશક્તિ દાન-દક્ષિણા આપીને વ્રત પૂર્ણ કરવું જોઈએ.
 
વ્રતની મુખ્ય હાઈલાઈટ્સ:
•    શુભ તારીખ: ૨૭ ફેબ્રુઆરીએ એકાદશી વ્રત અને ૨૮ ફેબ્રુઆરીએ પારણા.
•    શુભ મુહૂર્ત: ૨૮ ફેબ્રુઆરી, સવારે ૦૬:૪૭ થી ૦૯:૦૬ સુધી.
•    ફળ: આ વ્રત કરવાથી મોક્ષની પ્રાપ્તિ થાય છે અને આરોગ્ય સુખમાં વધારો થાય છે.
દાનનો મહિમા
શાસ્ત્રોમાં ઉલ્લેખ છે કે એકાદશીના પારણા સમયે જરૂરિયાતમંદોને અન્ન અને વસ્ત્રનું દાન કરવાથી અશ્વમેધ યજ્ઞ સમાન પુણ્ય ફળ મળે છે. રંગભરી એકાદશીના દિવસે ભગવાન શિવ માતા પાર્વતીને પ્રથમવાર કાશી લાવ્યા હતા, તેથી આ દિવસે ગુલાલથી હોળી રમીને ઉત્સવ મનાવવાની પણ પરંપરા છે. આ પવિત્ર દિવસે ભગવાનની કૃપા મેળવવા માટે ભક્તોમાં અત્યારથી જ ઉત્સાહ જોવા મળી રહ્યો છે.