કુઆલાલમ્પુર, તા. 24: સુંદર દરિયાકિનારા, ગગનચુંબી ઈમારતો અને લિજ્જતદાર સ્ટ્રીટ ફૂડ માટે જાણીતું મલેશિયા હાલમાં એક ગંભીર સ્વાસ્થ્ય પડકારનો સામનો કરી રહ્યું છે. દક્ષિણપૂર્વ એશિયાના આ લોકપ્રિય પ્રવાસન સ્થળ પર હાલમાં ક્ષય રોગ (Tuberculosis - TB) ના કેસોમાં ચિંતાજનક વધારો જોવા મળ્યો છે, જેને પગલે દેશના આરોગ્ય અધિકારીઓએ પ્રવાસીઓ માટે સાવચેતીની ચેતવણી જારી કરી છે.
કેસોમાં અચાનક ઉછાળો
મલેશિયાના આરોગ્ય મંત્રાલયના તાજેતરના અહેવાલ મુજબ, વર્ષના માત્ર છઠ્ઠા સપ્તાહમાં જ 596 નવા ટીબીના કેસ નોંધાયા છે. આ સાથે દેશમાં કુલ સંક્રમિતોનો આંકડો વધીને 3,161 પર પહોંચી ગયો છે. ખાસ કરીને પર્યટકોમાં પ્રિય એવા સબાહ (Sabah) રાજ્યમાં સૌથી વધુ 755 કેસ નોંધાયા છે, ત્યારબાદ સેલાંગોર, સારાવાક અને જોહરનો નંબર આવે છે.
તહેવારોની સીઝન અને ટ્રાન્સમિશનનું જોખમ
વર્તમાન રમઝાન માસ દરમિયાન સામાજિક મેળાવડા અને ભીડમાં વધારો થતો હોવાથી સંક્રમણ ફેલાવાનું જોખમ વધી જાય છે. મંત્રાલયે સ્પષ્ટ કર્યું છે કે રમઝાન પોતે રોગનું કારણ નથી, પરંતુ આ સમય દરમિયાન લોકોનું એકબીજા સાથે મળવાનું વધે છે અને બજારો કે ધાર્મિક સ્થળોએ નબળા વેન્ટિલેશનને કારણે વાયરસ સરળતાથી ફેલાઈ શકે છે.
પ્રવાસીઓ માટે ખાસ સલાહ
જો તમે મલેશિયા જઈ રહ્યા હોવ, તો આરોગ્ય મંત્રાલયે નીચે મુજબની કાળજી રાખવા સૂચન કર્યું છે:
•    માસ્કનો ઉપયોગ: ભીડભાડવાળી અથવા ઓછી હવા ઉજાસવાળી જગ્યાએ માસ્ક ચોક્કસ પહેરવો.
•    શિષ્ટાચાર: ઉધરસ કે છીંક ખાતી વખતે મોં ઢાંકવા જેવા પાયાના નિયમોનું પાલન કરવું.
•    લક્ષણો પર ધ્યાન: જો તમને બે અઠવાડિયાથી વધુ સમય સુધી ઉધરસ રહેતી હોય, તો વિલંબ કર્યા વિના તબીબી તપાસ કરાવવી.
પ્રવાસન પર અસર?
મલેશિયા હંમેશા ભારતીય પ્રવાસીઓ માટે ફેવરિટ રહ્યું છે, ખાસ કરીને વિઝા-મુક્ત પ્રવેશની સુવિધા મળ્યા બાદ પ્રવાસીઓનો પ્રવાહ વધ્યો છે. જોકે, આ નવી સ્વાસ્થ્ય ચેતવણીને કારણે મુસાફરોએ હવે થોડી વધુ સાવધાની રાખવી પડશે. અધિકારીઓ પરિસ્થિતિ પર સતત નજર રાખી રહ્યા છે જેથી પ્રવાસન પ્રવૃત્તિને મોટી અસર ન થાય.